和花亭壽司 (已結業)

前幾日o係openrice見到咁多好評, 琴日就同男朋友去左呢間日式餐廳食飯。去到門口, 見咁多人等緊位, 心諗呢間餐廳都應該係唔錯既選擇。不過食完呢次之後, 我地都應該唔會再返黎幫襯, 因為真係覺得唔係好抵。我地第一樣食o既野就係三文魚腩壽司。見佢地個樣都好靚仔, 就起筷送佢埋嘴邊..唔夠一秒就出事了。塊三文魚腩好似普通三文魚咁, 口感一般, 舊飯握得唔係好實, 醋既分量亦唔見得落得適中, 味道比超級市場買既三文魚腩壽司還要差。跟住我地再品嚐其他食品, 有火炙咖喱三文魚壽司, 普通三文魚壽司, 三文魚六小福, 特大天婦羅蝦壽司, 三文魚石狩湯, 吉列棒棒蝦同鰻魚壽司。火炙咖喱三文魚壽司, 鰻魚壽司同普通三文魚壽司都唔係特別有驚喜, 不過三文魚六小福都算係一個幾特別既配搭。 特大天婦羅蝦壽司外貌非常討好, 食落亦非常爽脆, 係我地最滿意既! 三文魚石狩湯足料但味道好清, 唔係好特別。個人係因為鍾意食三文魚而點這個湯。吉列棒棒蝦中規中矩, 色香味俱全, 不過好熱氣。食物質素普通, 加上又要排隊, 食完一次真係無乜意欲再光顧lu~