呢日下午同大媽同事出尖沙咀幫老闆買餅請同事食，我哋就順便蛇一蛇自己去嘆個下午茶先🙈。行開尖沙咀就𥄫下藥房啲離地口罩價啦，睇下睇下就行咗入香檳大廈，仲發現咗有間勁少女風裝修嘅舖頭，原來係賣蛋糕嘅。
女店員見到我哋就即刻熱情介紹各種千層蛋糕嘅口味😊。由於我哋未食過，所以都係一人食一件100g試下先。
🍰千層蛋糕口味有原味、摩卡咖啡朱古力、班蘭同白咖啡。我哋就試咗班蘭同白咖啡，聽講兩種都係東南亞特產。
千層蛋糕份量有分100g、250g同500g，店舖有喺雪櫃到切件示意分別有幾大件。愈買得大件就愈平，啱食的話都可以買一條蛋卷嘅Size抵啲👍。
班蘭千層蛋糕($58/100g)，班蘭味道清香撲鼻😌，唔錯。平日班蘭味嘅雪芳蛋糕就食得多，千層蛋糕就第一次食，幾有新鮮感。
白咖啡千層蛋糕($68/100g)，呢件味道都ok，但咖啡味☕️無想像中咁濃，唔算突出。
呢到嘅千層蛋糕同LadyX嗰種嘅口感唔同，因為呢個係用蛋糕加忌廉分層，而唔係用一層層嘅薄餅Crepe，口感層次無食開嗰種咁分明，但就會比較食得出個口味😗。
總括嚟講，呢件蛋糕對我而言係一個千層蛋糕嘅新體驗。蛋糕味道ok唔太甜，但價錢唔算平，不過一試無妨。環境幾得意，有隻大貓貓牆畫🐱，同一張大長檯，比人堂食。不過我估大部份人都係外賣多，而且位置有丁點隱秘。如果要搵入口，就認住美麗華廣場對面啦。
