我哋每人嗌左一杯嘢飲，嗌咗兩個包同埋是日甜品。
我叫咗一杯Flat White, 咖啡味好香，偏向係nutty味嘅。
飲完咖啡瞓唔到覺嘅男朋友照交嗌左一杯凍朱古力... 賣相同味道都算不錯啦
呢個黑麥包上面配杏仁同埋沙律醬，有少少辣辣地，而且杏仁碎有好多，口感唔錯。
而素菜漢堡就有兩小份，裏面夾咗蕃薯🍠生菜。餡料幾厚。不過其實個包係細份嘅😆 當下午茶分量剛剛好，午餐就可能要額外再叫多啲甜品先夠飽。
咖啡吧隔離嘅玻璃櫃會display當日嘅麵包同蛋糕，為食妹當然要食埋個甜品先滿足😋 我哋叫咗栗子蓉伯爵茶Cheese Cake. 個蛋糕好rich, 無論係栗子味伯爵茶味定係芝士味都好出，而且呢幾隻味道都非常之夾。值得一提嘅係真係可以食到有栗子蓉，足料有心思👍🏻 下次嚟再試另外啲款，甜品控覺得絕對值得encore.
講少少關於個環境，前面提到呢度係一間村屋，户外花園位置都有啲進食空間，而且種咗啲小盆栽，有種令人relax嘅田園感覺。村屋裏面其實有一間房係坐榻榻米，但相信要更加多人先至可以坐房。
仲有花園裏面嘅高達，都係一個非常吸精嘅特色擺設😬
踩開單車嚟上水，一定會再次拜訪呢間隱世村屋咖啡小店☕️
