丸和食堂 (已結業)

平時去開上水體育館打完波之後都會過對面街嘅一堆食肆到搵嘢食， 前兩日打完波之後又過嗰邊搵嘢食見到有間新開嘅日本餐廳， 諗住做完運動唔好食得咁heavy， 餐牌都幾多選擇， 刺身，壽司，拉麵，到便當都有， 餐廳唔算好大， 大約有20至30個座位左右。 枱與枱之間嘅擺位都唔算好迫。五色刺身拼盤刺身拼盤有甜蝦， 三文魚， 帶子 ，八爪魚和油甘魚， 刺身都夠新鮮， 帶子和甜蝦都幾鮮甜。九吋蒲燒鰻魚壽司鰻魚嘅肉質咬落幾有質感， 唔腥( 早排喺第二間餐廳食過鰻魚飯好重泥腥味)， 個燒汁都幾好味唔會過甜。餃子烏冬配鰹魚湯烏冬用咗稻庭烏冬， 煙韌彈牙， 個湯底清清地， 但幾香鰹魚味， 餃子應該係用咗雞肉和菜做餡料， 餃子皮煎得幾香脆。腐皮壽司+雪場蟹棒壽司+ 軟殼蟹反卷因為有位朋友唔食生嘢所以叫咗腐皮壽司和鱈場蟹棒壽司， 個鱈場蟹棒都幾有蟹味。軟殼蟹炸得好脆身， 食嘅時候仲有索索聲， 配咗沙律醬和蟹子幾好味。鱈場蟹棒蟹子粟米沙律沙律主要以青瓜生菜粟米為主， 鱈場蟹柳絲和蟹子鋪面， 青瓜夠新鮮幾爽口， 青瓜和鱈場蟹柳呢個配搭都幾夾， 撈勻一齊食幾清新。