Saravanaa Bhavan (已搬遷) 新店位置

成個長假期間，又打邊爐，又燒嘢食，實在食得太多肉，今晚結伴去尖沙咀亞士厘道樓上舖食素食咖哩，睇食評話好正宗及地道，一上去真係南亞人士居多，服務也不錯，佢問我哋坐室內定室外，我哋揀左室外大洋台，好舒服。我哋點左北印度套餐，大盤內有八小碗不同味道嘅醬料，有甜、酸、唔辣、微辣、小辣、中辣口味，中間放左微辣野味印度炒飯，一大片烤印度薄煎餅，另上一個好似砧板咁大塊嘅印度烤餅及印度辣湯，兩個人淨食呢個套餐都飽左七成；好彩我哋各人分別叫左杯芒果拉昔及特色德拉絲咖啡嚟解解辣，杯芒果拉昔好棉好滑，微甜微酸，值得推薦；我哋多叫左兩個小食，菜花‘65’，即用印度辣炸粉炸椰菜花，幾好食喎，唔知係唔係食完個八小碗套餐，食唔到辣味，炸到好香脆；另一小食酥炸茅屋芝士油條，外貌唔似油條，似正方型豆腐多D，熱熱地食都唔錯。