三分俗氣 (已結業)

同屋企人去完新蒲崗探親戚之後覺得好肚餓，所以就隨意OpenRice左附近睇吓有咩食，就發現到呢一間上海菜，我同屋企人都好鍾意食上海菜，所以諗都唔使諗就沖左入去啦。由於我地比較早入座，所以都唔使點等位，環境幾闊落。望到餐牌，菜式好多，價錢亦都唔貴，十分好。由於天氣比較熱同埋太肚餓嘅關係，我哋總共叫咗六個菜式，主要都係涼食無乜熱食。食上海菜一定要嗌小籠包同生煎包喇，新鮮出爐，啱啱上菜嘅時候仲帽緊煙，小籠包皮薄涵靚多汁，用料豐富。而生煎包個底煎得岩岩好，脆脆地，有豐富肉汁，十分美味。涼食方面有涼拌雞絲粉皮，麻醬分量充足，粉皮滑。口水雞唔會太麻辣，好惹味，雞肉多又少骨。而四喜烤夫，就好似酸齋咁樣，不過就用咗上海嘅方法去烹調，酸酸甜甜開胃。最後就嗌咗經典嘅手抓餅，手抓餅比較薄身，咸咸地，新鮮出爐仲好脆。同埋一份甜品煎芋餅，有芋泥同埋紅豆泥，甜而不膩，食過返尋味。