鴻星中菜 (已結業)

最近做緊超值原隻鮑魚，雞燉翅，松葉蟹拑全包宴，重話有七五折，咁又去試下囉。一向都知鴻星啲嘢偏咸味/味精重，今次都叫定師傅走味精，點知張單真係mark住"無味精"，咁即係話有其他客都覺得佢地味精重啦！出街食飯都唔可以要求咁高下下講健康，但落少啲無咁咸都無壞啫！我有friend同有親戚食過將軍澳個間分別透唔到氣同頭痛，你話味精有幾重喇！原盅雞燉鳳尾鮑翅 - 我諗呢味無得走味精，一早煲定家嘛！我唔怕味精嘅，梗係覺得味濃啦！不過唔係盅盅翅都有咁大塊架，我阿媽塊細啲。京醬爆雪花蚌 - 雖然走味精，但反而味道啱啱好，啲蚌爽身又唔腥，其實師傅手勢都幾好啫，唔駛落咁咸嘅。百花炸釀松葉蟹拑 - 有原隻蟹肉拑，但大隻啲會好啲。有啲沙律幾好味。原隻鮑魚花菇翡翠 - 鮑魚爽脆，冬菇算厚肉。脆皮黄油鷄 - 一般啦！蝦子烤燴伊麵 - 最抵讚嘅一味，炒得爽身不油膩，蝦子香，麵質唔硬又唔太"林"。精美甜品係喳咋，一般啦！一家四口有電視睇環境舒適酒樓晚飯有鮑有翅都係$500，算係咁啦！