一郎 (已結業)

香港開咗好多拉麵店，但係唔係間間都好食。今日喺尖沙咀搵到呢一間拉麵店，除咗拉麵好食，小食都有水準，所以真係值得推介。呢度嘅拉麵$88-$98， 限定拉麵就$138及$188。見到有期間限定嘅黑松露拉麵，黑松露控嘅我當然要叫一碗。拉麵有特定粗麵、幼麵配唔同湯底。我哋揀咗拉麵、小食同埋飲品。▶️限定拉麵-黑松露拉麵$188呢個拉麵有好多黑松露，一片片～一上枱已經聞到好香濃嘅黑松露味，呢個拉麵配粗麵。曲身麵質揀咗普通，軟硬度適中。個湯底非常之濃郁，入邊仲有糖心蛋、蔥、蘆筍等等。鍾意佢嘅拉麵湯底濃郁，但係又唔會好鹹，恰到好處。麵質粗身有彈性，好食！▶️ 柴郎君：鰹魚醬油拉麵$88呢個鰹魚醬油湯底，清得來又好鰹魚味，真係好食😋呢個拉麵係配幼身拉麵，麵身夠爽，我個人就鍾意食幼身麵。拉麵配料基本上一樣都係有糖心蛋沖蘆筍、筍等等。▶️羽根餃子(4隻）$32呢個餃子🥟煎得好靚，而且皮夠薄。入邊嘅肉又好味，點醋食唔錯！▶️唐揚炸雞（4件）$38呢個炸雞外皮香脆鬆化，入邊雞肉又滑又多汁，真係非常讚！▶️元祖波子汽水$24及抹茶可樂$26而家店內消費滿$100就可以有扭蛋抽獎，我就中咗$10優惠券可以下次使用。