滿堂樂滬京風味 (已搬遷) 新店位置

食過「真真豆漿大王」之後，發現紅磡仲有一間賣上海粢飯，而且2022今年仲獲得米芝蓮加持，促成去食嘅原因。米芝蓮街頭小食餐廳名單出咗之後，行過滿堂樂好幾次，次次都大排長龍，有日趁人少少，排吓隊試吓先。▪️鹹豆漿+粢飯 $34｜成日聽上海人食一嚿粢飯、一碗鹹豆漿做早餐，究竟會係咩風味？粢飯單叫一嚿$23，另外可以跟鹹/甜豆漿，一次過試齊兩款。粢飯同樣係即叫即包，阿姨純熟嘅手勢，三兩吓就包起一嚿粢飯🍚粢飯外形有少少走樣，唔係靚靚嘅圓柱，不過都係以糯米飯包肉鬆、油炸鬼、榨菜。每款材料嘅份量都啱啱好，輕輕一咬就食到餡。至於鹹豆漿真係第一次食，原先以為好奇怪，一試先知味道又幾有趣喎。送上枱嗰陣叔叔仲介紹可以落辣油。就咁望鹹豆漿嘅材料都幾豐富，有無味豆漿、蝦皮、油炸鬼、蔥花等，味道當然係鹹鹹哋，加啲辣油味道更有層次，確實好適合配粢飯一齊食。-餐廳堂食座位唔多，只有兩張圓枱同一張細枱，想食嘅話除咗排隊就非外賣莫屬🙈。