美味故事 (已結業)

今日食左間覺每樣野都睇得出好有心思既餐廳。好滿足。餐廳環境舒服，有家舒服既感覺。播住優雅既音樂，環境幽靜，好適合約會拍拖。最緊要係提供到一個可以細心欣賞食物既環境。叫左個慢煮安格斯牛柳套餐。首先黎左個芒果冰沙餐前飲品。好少餐廳會有餐前飲品，係會令人眼前一亮。冰沙好fresh，濃郁既芒果味，飲得出係用鮮芒果黎整。好好飲，細細杯，啱啱好。之後黎左個蘑菇濃湯。飲到有細細粒既蘑菇粒，口感非常好。蘑菇陣味好香。加埋蒜蓉包食，口感豐富又好味。之後頭盤係溫泉蛋蟹籽沙律。看似普通，但所有既味道配搭超好。溫泉蛋撈沙律，蛋令沙律好甜。蟹籽陣鮮味令到沙律提升左個陣鮮味。醋既濃味又襯托得好好。看似普通但真係好好食既沙律。仲有紫菜雞卷。雞肉整得滑，中間有蟹柳。成個口感就係滑，紫菜味道又唔會太搶味，一流。終於黎左個慢煮安格斯牛柳。切開佢，水份仲有，外層乾身味道香，入邊水份好多，口感超好。慢煮加埋靚牛柳，無得輸！食完鮮味，配汁食又係另一個層次。一舊煮得好食既牛，配咩汁都好似畫龍點睛。好好味！食埋個D24榴槤慕斯。口感滑，一啖已經食到濃郁既榴槤味，食到中間又有新鮮榴槤餡，好濃太好食。好少食到咩都好好味又有心思既餐廳。