一起果醬 (已結業)

Let's Jam 可謂良心小店嘅代表，絕對值得大大力懲罰，所以我幫襯嗰日雖然係平日嘅四點幾接近五點，但係咁大間舖居然都有八成滿，堅係犀利👍😮。叫得 Let's Jam，果醬當然係主打，可惜下午茶餐冇得揀佢哋最出名嗰個果醬九宮格多士，於是我就點咗果醬奶油窩夫 + 鮮果 + 飲品嘅 Tea Set，果醬我揀咗比較少見嘅蛋黃菠蘿味，飲品有個果醬系列，我揀咗比較大路嘅玫瑰蘋果茶。首先要讚下杯玫瑰蘋果茶，真係勁香勁香👍，當時 waitress 其實係將杯嘢放喺離我較遠嘅枱邊，點知一放低，強勁嘅玫瑰香味已經撲鼻而來，非常誇張😆。我即刻呷一口，雖然對於我嚟講都係稍為偏甜，但玫瑰嘅清新香氣已經完勝一切，💯 分。至於個蛋黃菠蘿果醬味道就非常特別，甜甜哋鹹鹹哋，仲有啖啖菠蘿茸，蛋黃同菠蘿嘅味道都好出，但又唔會互相掩蓋。兩樣風馬牛不相及嘅食物竟會如此 match，真係神奇😮！作為本港果醬界嘅翹楚，Let's Jam 嘅水準絕對係出色嘅，真係希望佢哋可以開多幾間分店，方便一眾果醬控去幫襯。