函館元祖北海道拉麵 (已搬遷) 新店位置

雖然有「函館」地址係手, 但人生路不熟, 展開一段「尋找函館的故事」, 行左唔少冤枉路先搵到.第一次親身幫襯, 應該感到好陌生, 然而實在對「函館」太熟悉, 感覺怪怪; 行到身水身汗, 先飲杯凍麥茶, 即時涼透心; 叫左個鹽味拉麵加牛油, 唔知係咪見到我個相機袋以為我係飲食記者, 五分鐘碗麵就極速送到, 唔錯唔錯.先飲一淡清湯, 覺得落左少少味精, 不過只算輕微, 幾好, 之後整融塊牛油再試個湯底, 融化左既牛油令湯底有飛躍性既提昇, 變得幼滑淡香, 可惜牛油太細塊, 當牛油湯底同鹽味湯底完全融和後, 幼滑淡香既感覺就變得太弱喇.麵係用西山麵, 麵身黃黃微曲, 少少彈牙, 口感唔錯; 碗面有兩塊叉燒, 少量荀片紫菜, 大量蔥花芽菜, 叉燒肥瘦適中, 脂肪分佈均勻, 有咬口, 有徵微燒過既香味, 極好!! 其他配料亦唔錯, 蔥花尤其香口.食麵食得好滿足, 之後叫多個柚子雪糕, 個人認為奶可能落得極少甚至無, 覺得係雪葩先真, 不過唔緊要, 個柚子雪糕味道清新唔太甜, 有少少柚子肉, 唔錯.食物水準高, 價錢合理服務佳, 師傅店員笑容親切, 一定會再去!!