六丸(居食屋)日本料理 (已結業)

舖面算大佔兩個舖位，到嘅時候已兩點，不過餐牌本身冇下午茶依然繼續午市。呢輪食咗好食嘅蛋包滑蛋飯之類，一不留神又嗌咗個「滑蛋豬扒飯」。就知衰咗。蛋黃蛋白冇搞勻維持邊黃邊白，滑蛋同個「滑」字冇緣，頂多只能叫「濕蛋」，豬扒外皮預咗俾蛋扎住唔慌會脆，但質地鞋過我塊面，硬過我脾氣……質素類近便利店買自叮嗰啲飯盒。「壽司烏冬（松）轉拉麵」情況好啲，碗拉麵居然比照片大碗，好多壽司排哂喺度，質素唔算太曳，仲有件三文魚腩，小型花之戀係一件吞拿一件三文，算係大堆頭對得住個價錢。去櫃檯找數先發現只收現金或boc pay，而我後面冇人排隊，摷銀包袋散紙俾錢時成手都係嘢唔得閒，歷時大約1分鐘，收銀已顯得唔耐煩反反眼……旺角食肆侍應啲態度果然名不虛傳。完。