川婆婆 (寶勒巷) (已結業)

去完成日迪士尼，又餓又攰，一定要食餐勁既。同啲朋友傾食乜，一啲又話打邊爐一啲又話燒肉，咁不如黎呢間~川婆婆~食啦，一次滿足哂幾個人既口味。餐廳好多人呀，我地出到黎大約8點零，已經好多人等緊第二輪。呢度既串串鍋，燒肉放題係食100分鐘，都好夠時間食。我地加左30蚊要左鴛鴦湯底，係四川麻辣鍋+養生菇菌雞湯，麻辣鍋幾麻但唔算太辣，而養生鍋好足料，勁多菇。燒肉之前先食送既雞煲，醬汁味道都唔錯，好快就清哂。拎走個煲，換塊鐵板就燒得。我地揀既餐有送海鮮拼盤，蝦、鮑魚、海蟶、蜆，樣樣都好新鮮，覺得個蜆最正，好肥美。牛肉望落都好靚仔，食落牛味濃。自助吧都有好多款式食材拎，最鐘意係鮮牛系列，包住唔同食材，各有特色，泡椒牛肉、芫茜牛肉等等，燒又得，滾又得，索哂麻辣湯汁，超惹味。出面仲有好多一盅盅配料，鴨血、雞翼、雞軟骨、魚皮餃、牛栢葉等等，連埋串串，都有五、六十款，好豐富。有汽水任飲，呢度啲汽水係樽裝，好少見，呢枝桃味茶幾好飲，桃味香，清甜解渴。如果想飲酒，每枝都係加十蚊，幾抵飲。好滿足，玩左一日又食得飽飽。