二鍋頭 (嘉芙中心)

營業中

休息中

今日同朋友喺尖沙咀行街，夜晚就順便喺度食埋飯，我哋二人都想食任食嘅邊爐，咁啱搵到呢間價錢唔貴選擇有幾豐富嘅火鍋店就嚟試吓。首先入到去環境都幾大，乾淨而且企理，仲有好多部大電視，可以邊食邊睇電影。自助區有多款打邊爐嘅配料，同埋飲品。店員介紹，最近餐廳有推廣，雞煲同埋意大利酒，有白酒紅酒同埋威士忌，平時食雞煲多數都係飲啤酒，呢個推廣幾特別同埋唔貴，鍾意飲酒嘅朋友可以試試。另外打邊爐方面我哋揀咗$198嘅套餐，店員話加多$100就可以任食高級和牛，真係好抵原本都想茄蛋見咁多嘢食我哋兩個又唔係食得多野所以就打算下次。首先除咗任食雞煲之外，仲有鴨煲同埋豬手煲，好有驚喜因為一般嘅火鍋店都係得雞煲任食。一開始當然係試吓佢哋雞煲先，好惹味，辣度啱啱好，雞都好滑！食完雞煲之後就試佢嘅豬手煲，原本都冇抱太大期望，點知真係好高質，啲豬手蚊到好林，仲要淡淡骨膠原，好正！食完煲仔之後就換湯打邊爐，我哋揀咗沙嗲湯底，都幾濃味，邊爐配料方面唔算話超多，但係都有好多我想食嘅海鮮同埋肉類，夠晒飽。 總括嚟講，$198可以食到咁多嘢真係抵到爛，仲要係質素唔錯，尖沙咀任食火鍋呢個價位真係值得去試。