媽咪雞蛋仔 (已結業)

放假去深水埗行下街，行到攰攰地自然想搵野食醫下肚。呢間可以話想試好耐，但一直無咩機會同時間試小食。印象中以前機緣巧合好似有試過一兩粒，但當時無特別記店名，所以都唔確定係咪呢間。店面環境都幾好認，店名夠大顏色都好鮮明，通常係遠處都好易認到。餐牌都算清晰，通常係個款口味雞蛋仔會附上圖片說明，都幾貼心。伯爵茶雞蛋仔呢款好似唔係長期有嘅款式，同行個位對伯爵茶甜品好似情有獨鍾，所以就叫咗呢款。由於係即點即烘，都需要少少時間，不過係可接受嘅程度，唔算太耐。拎上手熱辣辣，有淡淡伯爵茶香飄出。雞蛋仔外層較厚，但都做到卜卜脆效果。內層尚算軟熟，伯爵茶味真係幾濃郁，咀嚼一陣仲有陣陣餘香係口腔散發。可惜我唔算太着迷伯爵茶味道，有機會想試返原味雞蛋仔，個人認為最簡單同原始嘅食物最體驗到店家手藝。