道鮨日本料理 (已結業)

呢間位於銅鑼灣上樓嘅日本料理，供應omakase，而午市都有供應一啲定食，有熟食、刺身、壽司、海鮮丼等，豐儉由人。呢度地方唔大，但坐得幾舒服，好有日式食店氛圍。御膳會包左沙律、茶碗蒸、甜品、飲品，沙律好新鮮，清新開胃蒸蛋夠熱，又滑溜，唯獨蛋味唔夠濃郁。我點左個吞拿魚御膳，價值$420，一份10件，全部係吞拿魚，啱哂我。分別有拖羅、火炙拖羅、兩件吞拿魚腩、兩件赤身、四件吞拿魚蓉卷，擺盤精美。火炙拖羅油份滿滿，肥脂爆棚，燒完後將魚油香味散發哂出來，味道超好；拖羅壽司雖然無炙燒，入口滑溜，口感飽滿，油香四溢吞拿魚腩相對無咁肥美，肉質軟腍，比一般壽司店食到嘅就已經高幾個層次啦。赤身色澤紅潤，油脂冇咁重，口感清爽，魚味濃郁，另一種風味吞拿魚蓉卷都好有驚喜，用上赤醋米飯，加上份量不少嘅吞拿魚蓉，配合脆紫菜，口感、味道都突出，令人留低深刻印象最後送上一份豆腐雪糕，味道清新冰涼，作為飯後甜品，都甚為出色。