第一郡 (已搬遷) 新店位置

今晚老公有約，又係一個人的晚餐。放工要去街市買少少野，又突然好想食班蘭甜品，諗起深水埗地鐵站附近有北河街街市，又有間好味嘅越南野，之後慢慢行返屋企當散步又得，一舉三得。今次已經係第三次幫襯第一郡，記得第一次嚟係兩年前，當時服務態度好差，衞生亦都麻麻，雖然食物唔錯，但都令人卻步。第二次就係半年前，大約係佢開左港島分店後，咦，好左好多喎，侍應都換哂。今晚六點半嚟到，職員安排我一個人坐喺近門口嘅2-4人檯，坐低後我即刻order左番茄蟹膏湯檬同班蘭綠豆糕。甜品預先整好所以先上，湯檬隨即都到埋，有效率，岩哂肚餓嘅人。湯檬配料豐富，一眼望落去有番茄、蟹糕一舊、厚切扎肉兩塊、豬紅、生菜等，飲一啖湯，冇味精感，好清甜，檬粉唔算多，所以我可以連湯都飲埋！班蘭糕有好重天然班蘭香味，好夠煙韌，配埋綠豆層一齊，人間美味啊😋七點開始有好多人等位，所以我食完即刻走人，臨走想買多件班蘭糕點知已經賣哂，想食要提早order呀