喵一下 (已結業)

知道呢間店由中環搬咗嚟觀塘，係幾開心。係社交平台 book位，不過好似漏左單，唔緊要，可能太新，未夾好，好彩我哋早到有位。下午選擇算係多，而且個價錢終於正常返啲啲。餐廳地方好大，坐得舒服同鬆動。成間餐廳置身係書店，周圍都係書包圍住你，幾舒服。照燒雞便當，88元，超欣賞多款小食，而且款款都好食，呢個有驚喜。獅子狗芝士卷，好味。波菜用芥末調配，勁開胃，仲有菇都係。要讚下個湯勁有心思，係豆腐花，係花嘅形象。照燒雞份量係好，味道超正，燒得剛好，汁係配得好好。同事話魚如果再熱啲會更好，魚係好味。同事大讚燒汁牛肩胛金菇配得好，牛夠哂味，而且係大份，足夠食哂碗飯。雲朵系列，先打卡，配套餐就每杯減10元，38元。荔枝蝶豆花梳打，初初我都幾驚藍色飲品，易伏，但呢杯係勁好飲，蝶豆花幾出，梳打再衝一衝上去，好清新。同事叫紅白火龍果蜂蜜檸檬，沙冰勁濃，如果怕太凍嘅，就唔好點呢杯，以上兩杯係飲得過。同事有點奶蓋，但味道好淡，無芭樂味，直頭唔得，差唔多奶蓋掂到底，先叫做有啲味。坐係度真係可以hea成日，咩書都有🙂係臨尾有職員唔知係覺得人聲太大聲定點，扭音樂再大聲啲，我哋坐正係套音響隔離，要鬥大聲。