OPPA韓國燒肉店

營業中

休息中

【油尖旺區】【OPPA韓國燒肉店】同田慈仁、恩典妹喺旺角搵嘢食，搵到呢間叫 Oppa 嘅韓燒就好想食，即訂。不過都要留意 oppa 呢個 term 係女性專用，男人講要叫返 hyung。多謝韓國朋友六年前提供資訊，有用至今。入去先見到都幾爆場，唔怪得咁難訂。叫咗個 $458 嘅「和牛拼盤」，有美國上肩胛肉、美國牛小排、美國下肩胛、日本A4背峰肉、日本A4上眼肉、日本A4牛肉眼、1++韓牛肉眼、澳洲和牛頸脊、澳洲和牛舌，我覺得所有牛都幾好食，呢個價錢嚟講又真係唔貴喎。食埋 $348 嘅「黑毛豬拼盤」，有五花腩、西冷扒、豬鞍，豬味都幾夠香，同埋好多時食豬會好鞋口，佢哋嗰啲唔會，幾好食。最後大大件豬鞍好似斧頭扒咁，侍應仲好主動過嚟幫手剪，剪好之後煎起上嚟更加得心應手，唔錯。嘢飲方面，大家 share $88 嘅「蜂蜜原漿米酒」，幾得意，真係有蜂蜜滲入去，唔係求其溝個味就算。田慈仁飲 $28 嘅「甜過初戀」即係梨汁柚子梳打，okay 嘅，我飲 $28 嘅「擺明暗戀」係菠蘿提子梳打就擺明致敬女同事。埋單 $1045，旺角食到呢個質素，冇咩好嫌三嫌四了。。。（地址：旺角洗衣街117號建煌華廈地舖）