🍊 湯底
呢度湯底係一人一鍋，一大班朋友聚餐可以照叫火鍋配料一齊食而又唔需要考慮其他人對於湯底嘅口味。我哋揀咗嘉慶椰子藏雞濃湯鍋同康熙花膠雞湯鍋，兩個雞湯都好足料，湯底入面有好多雞件，康熙鍋入面仲有好大片花膠，令到湯底味道濃稠又補身
🍊 黃金響鈴
巨大版嘅響鈴用咗秘製鹹蛋黃醬去炸，咬落去非常脆口，而且蛋黃醬味道好惹味，無論係單獨食或者浸湯底食都好好味
🍊 貴妃出浴手切本地牛肉
手切本地牛肉片嘅味道濃郁，而且油脂雪花分布平均，賣點係旁邊有一碟牛奶，職員建議我哋先將牛肉浸喺牛奶入面30秒，再拎去滾熟，形象化就好似貴妃出浴咁，浸完牛奶嘅牛肉會變得好滑身
🍊 手打珍珠帶子墨魚丸
一碟有四粒，手打墨魚丸非常彈牙，咬開入面有一粒珍珠帶子，層次豐富，味道帶有濃郁嘅鮮味，唔使加豉油已經好鮮味
🍊 滾得囍餃子拼盤
拼盤一碟有十粒餃子，每款有兩粒，包括和牛芝士、菜苗帶子、韭菜豬肉、馬蹄冬菇豬肉、芋泥豬肉，我最鍾意食菜苗帶子同馬蹄冬菇豬肉，清脆嘅菜苗絲混合軟熟嘅帶子，口感好豐富；爽口嘅馬蹄配鮮味嘅冬菇亦都好夾
🍊 桂花蚌/珊瑚蚌雙拼
桂花蚌同珊瑚蚌都好新鮮，而且切到好薄片，打邊爐好快就滾熟，煮熟後嘅口感非常爽脆，雙拼可以一次過食晒兩隻唔同口感
📍北角馬寶道33號寶馬花園1樓116-125號舖
位置就腳：🍊🍊🍊🍊🍊
餐廳環境：🍊🍊🍊🍊🍊
食物味道：🍊🍊🍊🍊🍊
整體CP值：🍊🍊🍊🍊🍊
