火五越式牛肉粉專門店 (其昌樓)

營業中

休息中

佐敦白加士街一帶好多食店，而呢間越式牛肉粉專門店就特別受歡迎。下午時段好旺場，聽聞性價比高，食物質素穩定，今次一於去試試。火五生牛肉粉大碗而且份量都幾多，牛肉粉湯底清澈，湯頭有啲牛骨鮮香，唔油唔膩。牛肉滑嫩，肥瘦比例啱啱好，河粉幾軟滑，可自加辣椒仔令味道更加豐富。法式咖喱牛肋撈檬牛肋好大舊，啖啖肉，食落腍滑，牛味都幾重，加上秘製嘅汁去撈檬好有越南風味。手作扎肉米紙卷米紙卷好大份，裏面材料有米飯丶扎肉丶生菜丶蘿蔔絲丶青瓜同粉絲，幾種材料加埋食落好爽脆清新，反而內裹米飯又帶軟腍口感，好特別，加上點埋酸辣汁，酸酸辣辣，十分開胃。香茅雞翼雞翼炸得酥脆，醃得入味。加上面頭嘅蔥花同炸蒜，味道更加豐富惹味。黃金脆魚皮呢款係鹹蛋黃炸魚皮，炸得勁卜卜脆，魚皮上沾滿鹹蛋黃醬，鹹蛋香味十足，越食會越上癮，勁邪惡。凍越南椰汁冰椰青水加咗啲椰子肉，味道清甜，而家大熱天時飲， 十分消暑。凍越南三色冰三色冰有椰奶香滑，飲落好清新，味道唔太甜，怕肥嘅人士可以一試。