泰燒遙 (已結業)

尖沙咀食飯食乜都好貴,想食好少少都要就住就住😫超無奈，點知有日經過諾士佛臺見到寫住$99 魚﹑蝦﹑蟹喎，咁就緊係9秒9打電話call 啲friend 嚟食餐好架啦！從無諗過可以係諾士佛臺食到咁筍價嘅美食！話晒糧尾時間都係”窄窄地”架啦。𨋢門一開傳來陣陣燒烤味，突然覺得好餓... 燒遙海中寶（冷盤）講真呢個燒遙海中寶份量係3-4都食唔晒，佢最正係入面有齊好多海鮮，對鍾意食海鮮朋友就啱晒，海中寶好開胃，因為我地點冷盤，個汁酸酸辣辣，海鮮底下仲要有粉絲，啲粉入晒味，的確唔錯！ 狂歡 魚 蝦 蟹 泰皇咖喱蟹99蚊咋！！！泰皇咖喱帶甜味，椰香味香濃，好食到停唔到手，估唔到99蚊可以食到咁大隻蟹 。泰式豬手皮軟腍膠質豐富，肉質亦非常嫩滑。泰式生蝦刺身 - $128配上泰式酸辣醬同清新薄荷葉一齊食，酸尾尾，辣辣地，十分開胃。啲野食好味道，份量好足，價錢夠貼地，一句講晒”扺食”！