我夠膽講句，我全都要！身邊經常有一兩個朋友同我講，
我唔食生野，果刻聽到我覺得自己好幸福，因為佢地
無辦法感受到刺身果種美好…果種滋味…果種難以掩飾既
滿足感，永遠都唔會領略得到。👇
📌盛 合 刺 身 -
▪️ 竹 日 本 拖 羅 盛 合 - $468
1
▫️ 佢地既刺身盛合係極多選擇，我就揀左最抵玩既 「竹日本拖羅盛合」，
一次過食勻「三文魚」、「日本真鯛」、「北寄貝」、「北海道帆立貝」、
「日本野生大拖羅」、「日本野生中拖羅」、「海膽」，每樣兩片。
不過適逢時令飛機貨關係，海膽改左比多兩舊大拖羅，
真鯛改左比多兩塊帆立貝，我就認為佢地刺身相當新鮮，
絕對係即日貨，完全食到魚鮮味，特別係北寄貝夠爽口彈牙，
大拖羅入口即融，油香十足；中拖羅有咬口，唔會有筋，
帶子夠軟腍，整體性價比極高！
📌佐 酒 小 食 -
▪️ 七 味 牛 舌 粒 - $68
▪️ 清 酒 煮 蜆 - $88
▫️ 跟住就嗌左兩樣野送酒，分別係「七味牛舌粒」同埋
「清酒煮蜆」，前者牛舌質感屬於厚身切粒，食落好有咬口，
牛味亦夠濃郁；後者「清酒煮蜆」清酒味相當突出，
蜆肉入口唔會太淡味，而且唔會食到沙，呢點抵讚。
📌燒 物 料 理 -
▪️ 牡 蠣 燒 - $100/四隻
▫️ 男人老狗一定要食蠔啦，基本料，呢個「牡蠣燒」燒完唔會縮水，
而且蠔係來自日本產地，肉質肥美，入口仲有爆汁效果，蠔味濃郁，好食！
📌日 式 鍋 物 -
▪️ 壽 喜 燒 牛 肉 鍋 - $128
▫️ 最後點埋個主食「壽喜燒牛肉鍋」就夠哂數，呢個鍋相當足料，
一鍋分別食到哂肥牛、魔竽、冬菇、本菇、粉絲、竹輪、洋蔥、金針菇、
豆腐、栗米、紅蘿蔔、嗚門卷、娃娃菜，細細一個鍋裝到咁多料，
真係幾驚喜；而壽喜燒汁調味適中，鹹甜比例岩岩好，唔錯。
📌日 本 酒 霸 者 の 最 -
▪️ 梵 吟 撰 純 米 大 吟 釀 - $348/720ml
▫️ 去得居酒屋無酒點對得住自己，我就同朋友SHARE左枝
「梵吟撰純米大吟釀」，呢枝日本皇室經常招待貴賓用到，
佢酒香入面帶有淡淡既柚子同埋葡萄香，精米含量55%，
極易入口，送刺身真係一流。
