車品品小食 (已結業)

喺某免費報紙專欄見到「車品品」三個字，怕見報之後人多，思前想後一晚，終於戰戰兢兢去埃華街，第一次。星期六兩點，鋪外冇人龍，度自動趟門夾親出嚟o既人，因為佢行最後，又夾親我前面嗰一位，又因為佢行最後。鋪內近街張張枱都有人，最入面大枱長邊近牆就仲有幾個位。原來係風口位，唔怪得大家聚埋另一邊坐。想食碗仔翅先嚟，所以少有咁唔洗諗，不過唔見有阿姐，所以攞個menu睇下。落咗單，等咗一陣（就梗o架啦）。碗翅一嚟，「好嘢！」個樣變咗少少，因為ｄ瘦肉撕碎哂，不過都仲係好似以前咁，好多料，同埋，冬菇幾靚，仲有，唔太杰又唔太稀，唔會好似食緊生粉芡咁。不過係正正常常一碗碗仔翅，不過係正正常常o既味道。不過，食完唔口渴。唔簡單o架。入去顧住度門，出嚟先見到高佬。真好。