影片
更多
2019-05-11
167 瀏覽
「呀~好開心同你一齊睇櫻花呀~素一郎」唔好意思，邊位！？咁既開場白，其實係想講第一次聽到「素一」呢間以中日式為主打既素食po飛(buffet)時 ,就已經覺得佢冇改錯名，你試下加啲日文名落去就知點解——「山本素一郎」，「田中素一」，你睇，完全冇違和感。講番今次被掃既素一以中日式做噱頭，有睇過我之前介紹中式素餐廳既朋友仔就知其實我對啲所謂素魚生壽司冇咩興趣，點解又要黎？世事既野唔係樣樣都可以比你參透既，師主～OK! 食野先食殼，睇你中唔中，日唔日先～咦？又真係又唔中又唔日喎！但唔計呢樣，其實個籠都幾大，坐得唔算迫都ok既～另外，設計其實亦冇咩style，但簡簡單單，整體氣氛都係舒服既～個人覺得唯一既敗筆就係個食物區。係咪真係窄唔敢講，但一來本身人係多（上面張相係算少人），而好多時啲人都要左閃右避。咁迫我重要係到影相真係令我好有罪惡感（淚）不過窄還窄，真身裡面又真係幾睇得下！速速去「相」，又睇下你有幾中有幾日先！一黎先掃一掃個沙律吧先！花款唔算多，溝埋一齊係會幾似日式沙律。鷹咀豆同紅腰豆任食唔錯。原個蘋果都比較少見？另外，係幾款沙律醬之中，特別推介芒果醬！涼一涼，清一清個胃之後，就到完全相
唔好意思，邊位！？
咁既開場白，其實係想講第一次聽到「素一」呢間以中日式為主打既素食po飛(buffet)時 ,就已經覺得佢冇改錯名，
你試下加啲日文名落去就知點解——「山本素一郎」，「田中素一」，你睇，完全冇違和感。
講番今次被掃既素一以中日式做噱頭，有睇過我之前介紹中式素餐廳既朋友仔就知其實我對啲所謂素魚生壽司冇咩興趣，
點解又要黎？世事既野唔係樣樣都可以比你參透既，師主～
OK! 食野先食殼，睇你中唔中，日唔日先～
咦？又真係又唔中又唔日喎！但唔計呢樣，其實個籠都幾大，坐得唔算迫都ok既～
另外，設計其實亦冇咩style，但簡簡單單，整體氣氛都係舒服既～
個人覺得唯一既敗筆就係個食物區。
係咪真係窄唔敢講，但一來本身人係多（上面張相係算少人），而好多時啲人都要左閃右避。咁迫我重要係到影相真係令我好有罪惡感（淚）
不過窄還窄，真身裡面又真係幾睇得下！
速速去「相」，又睇下你有幾中有幾日先！
一黎先掃一掃個沙律吧先！花款唔算多，溝埋一齊係會幾似日式沙律。鷹咀豆同紅腰豆任食唔錯。原個蘋果都比較少見？
另外，係幾款沙律醬之中，特別推介芒果醬！
涼一涼，清一清個胃之後，就到完全相反既炸物區喇！
講到日式，當然唔少得天婦羅吧！有綠豆、南瓜、秋葵、蕃薯等，唔算好油，不錯～上海炸饅頭、中式春卷、蘿蔔糕、印式烤餅等，呢啲普通野普通得黎都普通ok好味架！
另外重有啲唔知咩既中／日式炸波，呢啲就一般啦，而且好易飽肚。炸物區最後係到西式甜品（上圖最右方）。
而甜品個人覺得係呢到最弱既一環之一，中西各只有一款，而圖中果款芝麻糕亦係麻麻。
跟住突然黎到今次既高潮(對我黎講)！就係壽司區喇！
第一次食「素生肉」！唔……嗯…！？果然真係好似真壽司喎！！因為啲日本豉油同wasabi……
係呀...全靠呢啲令佢似一舊壽司，因為其實本身真係冇咩味。今次試左三文魚、吞拿魚同蝦，都係差不多，因為都係用蒟蒻做。
反而加洲卷果啲幾好味可以一試。
整體賣相的確似，同埋要讚既係舊飯幾新鮮，唔會硬哂一舊舊咁。
好喇團友，好快去完日本喇，而加又返翻黎香港試中式野喇！
一黎就係見到都飽既芋頭同蕃薯…重要係整條、整舊上…食po飛真係唔敢挑戰呢啲…然後就係一堆野食！
（左）干燒伊麵：應該同你食過既差唔多（食評中最hea！）（右）粟米：唔太鮮但亦唔太老，冇咩粟米味
（左）麻婆豆腐：必食之一！未食過麻婆豆腐有麻辣但又冇辣味！好有麻子香味♪（右）茄子四季豆：香口得黎唔會好濃味
（左）椰汁芋頭南瓜：有椰汁就會加分！唔會好「漏」，但芋頭好飽肚呢（右）豆卜炆冬瓜：入味，GOOD！（專業食評家style既comment）
（左）萄汁薯仔四蔬：有萄汁就會加分！加啲飯就成為一碟好正既碟頭飯（右）炒銀針粉：星洲炒米式既炒法，不過唔辣，粉既口感都唔錯
薑醋蛋：純素人士見到怕怕！點解唔出素蛋！？另一半話啲汁夠味，不過蛋未完全入味
（左）清炒菜心＋（右）炒椰菜：係呀，完全係港式既煮法同味道
（左）紅米炒飯：個樣越平凡越有內涵既見證！估佢唔到炒得咁香，推薦！（右）豉油皇炒面：相反呢個真係務實咁係平凡之中keep住平凡
（左）上湯娃娃菜：呢味一重味精就會扣分，好在佢唔係（右）鮮淮山雲耳勝瓜：純個人喜好，no comment（極冇責任感既食評）
（左）蘿蔔炆支竹（右）豆腐炆矮瓜(?) ：呢到都幾鍾意炆野，而炆野既味基本上都差唔多一口氣介紹左咁多款，真係手都乾……
係時候飲番啲野先！
飲品黎講都幾豐富，有豆漿、檸檬水、羅漢果水、紅菜頭檸檬水、杞子湯(?)、中式茶包，同埋間間舖頭都見到佢既熱水。要試哂咁多種飲品都唔易喎。
講起飲品，當然要講埋湯！
（左）名就唔記得左，不過較甜（右）白胡椒支竹湯：推介之一，雖然辣，不過係越飲越想飲果隻。在場都好多人飲，我都要等到第二轉先飲到。
唔知有冇朋友突破盲腸，作為一間主打中日式既食店，竟然係冇麵豉湯！
最後最後，真係最後，就係中式甜品（只有一款）。
木瓜雪耳糖水係正正常常既味，都好難得！因為好多時呢Ｄ糖水都好似好淡溝好多水，但佢冇！已經好滿意！
而且好足料，連杞子都好多，好受歡迎好快比人筆到見底。
總結：
作為一間係銅鑼灣既一間素po飛，都係唔會差得去邊既～環境服務都算ok～
講起服務，反而係啲staff個「郁」(look)同間野有啲格格不入。間野走清新輕鬆路線，但佢地又著哂黑色老西好似酒樓啲部長咁。
又可能因為咁，商業味較濃，唔似我地之前去果啲素po飛咁，可以同啲老闆有講有笑，咁feel到人情味。
野食覺得有少少油，不過唔係濃味果隻，即係都冇落太多調味料或味精。另外refill既timing都可以。
btw，食食下你會唔記得其實佢全係主打中日式…！
你話如果素一有機會開分店，叫素子好唔好？
「鈴木素子」……「藤原素子」……
同場加映：
門面：好醒目既一張壁畫，但會唔會有人諗「藝術既野……」？但我鍾意Ｖ字個font！
張貼
