御前牛盛日式涮涮鍋 (已結業)

企鵝哥今次就同最親密嘅朋友去食火鍋任食，想返起都係幾個月前嘅事，只不過冇咩心機寫食評。當時好似開張左冇耐，人數唔多，不過勝在夠乾淨企理，紫色背景。我哋升級要咗刺身，啲刺身有幾新鮮，特別係三文魚好肥美，另外甜蝦又夠鮮味。泰式生蝦都好爽口！中華料理雞煲終於上嚟啦，麻辣鮮雞配上麻辣醬，多重口味出晒嚟。啲雞比想像中滑好多，仲幾入味添。放題點少得牛肉，每一片薄切，估唔到比想像中更加鮮味。一放入去就熟左，啲紋都幾特別。仲有好多唔同嘅海鮮，啲蜆冇沙幾清甜；帶子好有彈性，魚都幾滑，仲有魷魚夠晒彈牙。仲有好多唔同嘅齋，金針菇就係哥嘅最愛，響鈴同埋豆卜唔錯。最重要係好多無限任飲嘅飲品，連韓國嘢都有，唔使擔心好似其他放題選擇咁少。