一入到呢間店舖，就覺得好寬敞，而且裝修好特別，佢哋牆上面佈滿動漫同埋卡通，有好多仲係我哋都鍾意嘅。座位比較細，不過都好乾淨。火焰醉雞翼 ($54)上枱嘅時候先點火，好吸睛，好有儀式感，而且食落淡淡酒香，肉質鮮嫩，佢仲配咗柚子醬，令到雞翼好開胃。煎餃子大阪燒 ($63)佢哋煎嘅餃子都會有脆皮，即係冰花，好脆好好食，呢個都幾容易接受，因為係表面用咗大阪燒嘅調味料，配埋煎香嘅餃子，口感好豐富，味道亦都好有層次。煎黑白松露豬肉餃 ($56 十隻)呢個係佢哋招牌之一，好有特色，咬落去就已經有好香嘅松露味，好驚喜，10分推薦餃子麵 ($54)呢個係餃子同埋面嘅自由配搭，佢有幾款唔同嘅面同湯底可以俾你揀，我哋最後揀咗鰹魚昆布湯烏冬配招牌餃子貳號，上枱嘅時候真係熱辣辣，我都爭啲淥親個嘴。係普通嘅餃子加麵，冇乜特別。雞軟骨串 （$45）總共有五串，佢哋燒得好好食，係用咗鹽調味，餸酒一流。整體上，呢間餐廳都幾好食，員工服務態度好好，環境裝修特別，俾人一種好溫馨貼地嘅感覺，而且佢哋嘅餃子的確煎得好春色，為咗佢哋嘅冰花絕對可以再嚟。…查看更多
