MX (翠屏商場) (已結業)

小心，外食醃製肉類食物可能有酸餿味！上次是魚米嘅火腿，今日係美心嘅紅腸，唔知下次會係……踩！大吉利是！千祈唔好好嘅唔靈醜嘅靈！如果唔係，一定即刻去買條6合彩去辟邪！🤬🤬🤬今日熱熱地，拎張被去焗，出開嚟就順便食埋嘢，叫個4餸麵，包括紅腸、豬紅、牛腩及上至愛嘅豬皮，加個凍茶少甜，要辣湯，原價要$48，實付幾多就唔講啦！所謂辣湯，原來只係加幾滴辣油落去啲湯度，完全無誠意！今次個豬皮無豬毛亦無沙，牛腩係正常車仔麵嘅碎腩，豬紅亦正常，唯獨是個紅腸就出事，一般車仔麵舖嘅紅腸會係煎好或炸好，但呢度無，而且咬落口仲有陣酸餿味，我以為係個別事件，點知第二件一樣，於是同執檯職員講，佢確認完係紅腸之後，居然繼續用佢平常速度去執檯，執完之後就用佢講均速走去廚房講，講完之後就出嚟同我講話已經同廚房講咗，佢哋會試吓味，之後就無之後，結果係點，我完全唔知，但佢個餐牌唔見有停售，亦完全無向我呢個當事人交代！😡😡😡我雖然坐起度涼緊冷氣，但就好鬼激氣😤😤😤，希望個肚無事啦！大吉利是！醜嘅唔靈好嘅靈！咁大間機構，居然服務同應變態度咁差！明知個客投訴，居然唔立即去廚房反映，明知個客有投訴，都唔同個客解釋，真係好過份！完全扣哂

上次寫早餐，今次寫下午茶餐。美心車仔麵餐，價錢雖然比同區貴啲啲，但份量亦多啲啲，所以計返條數，美心平啲啲。而且佢個三餸麵係有跟菜，唔似同區嗰啲，三餸就三餸，菜都無一條，只不過美心選擇無同區車仔麵咁多。今日我運氣好，送多嚿蘿蔔，連牛肉丸、豬皮同墨魚條（同區墨魚條只得一條，佢有兩條），加埋杯特飲黑糖奶茶（另加$10），共銀$51。杯奶茶好夠黑糖味，但個人覺得太甜，是否值得加$10，就見仁見智。沙爆豬皮例牌有沙，自己買嚟洗都分分鐘走漏眼，何況大堆頭咁浸泡，無大量豬毛已經係好彩。墨魚條有炸過，好食，牛肉丸雖然唔彈牙，但肉質鬆軟，而且咬落個心有啲紅，至少證明係肉丸（唔敢講係純牛肉），而唔係粉漿，唔錯。雖然驟眼睇，食個下午茶餐都要$51，係有啲貴，但整體食物質素確實比同區好，只要唔係想食啲了𠹌或特別嘢，同區車仔麵嚟講，美心勝一籌。

呢間開咗咁多年，估唔到呢篇居然係第一篇食評，可能係美心個名變咗幾次嘅緣故卦，如果唔係，無理由居然由我寫第一篇食評嘅。今日10點半過後至嚟到，居然有幾個人排隊，完全不可思議叫咗沙嗲牛肉麵配炒蛋及多士，加杯好立克，會員有得減$5，即係$32，咁嘅價錢，食到咁嘅嘢，絕對抵食。我喜歡將啲炒蛋放上多士一齊食，咁先至好味，今早嘅牛肉麵辣咗啲，上次食無咁辣😛，雖然我都食到，杯好立克就同其他茶記一樣攪唔勻，要自己攪。順帶一提，好心啲人唔食多士，唔食乜乜物物就叫餐時走咗佢，唔好咁浪費啦！我今日見到隔離檯無人，但一大片多士放起度，好浪費呀！