影片
啲人成日話「藍色總係畀人憂鬱嘅感覺」，計我話要睇吓係咩藍，Dark Blue陰沉，Light Blue輕佻，Aqua Blue獨特，Tiffany Blue港女最愛... ...藍色千變萬化，惟獨天藍色最令人心動，試問有邊個唔鍾意晴空？但如果大家見到嘅係天藍色嘅富士山，又會唔會更心動呢？適逢小妹嘅平日假期，一個人去觀塘呢個文青聚集地影相，行到攰，就上「開飯喇」睇吓有冇Cafe可以坐吓飲杯嘢，咁啱見到呢間位於敬業街工廈嘅工作室兼Cafe，發現一個食評都冇，於是就膽粗粗上去一探究竟，冇人試過就最好，愈冇人試愈激起我好奇心！其實搵路都需要一啲時間，尤其係呢個工廈多過大廈嘅觀塘，地下就係貨車上落貨嘅位，都唔知入唔入去好，終於掙扎入去搭Lift，又畀佢個門口嚇窒，心諗「似住宅多過似Cafe喎！」於是Send一個Whatsapp畀店主，佢一開門，我劈頭就問佢係咪Cafe，佢點一點頭，見到入面，先發現裝潢「骨緻」，舒一口氣。店主將餐牌展示，驚見「富士山」，原來呢個係小店特色甜品Mr. Fuji ，富士山造型嘅白涼粉以日本嘅京豆水製成，質感似蒟蒻，味道清淡，但食落水潤Q彈，配合糖漿同沖繩黃豆粉一齊食，香甜而不膩，再配埋個像真度咁高咁得意嘅造型，小妹喺食之前都忍唔住舉機狂拍！如果你嗌Set（The Nature Set，$70），仲可以試埋另一款天藍富士山系列，就係飲品Place You'll Go，面層係軟滑嘅香草Cream，之後係鹽味奶蓋，再之後係牛奶，底層係藍色糖漿同日本汽水，四層Layers層次分明，就好似積咗厚雪嘅冬日富士山，非常吸睛！小店內仲有好多書刊供客人閱讀，其中仲有一本專門介紹富士山嘅旅遊書，一路睇一路食住「富士山甜品」，感覺真係好奇妙！小妹未去過日本富士山附近嘅地方行，食完呢個甜品，真係好想一個人出走去一趟！
繼續閱讀