朋友生日飯，壽星揀咗《霸王川莊》。聽個名我一度誤會咗同樣位於尖沙咀嘅餐廳。餐廳位於iSquare嘅25樓，第一次上iSquare嘅高層，原來都仲有唔少嘅餐廳同酒吧。我哋被安排到VIP房入座，間VIP房近乎餐廳嘅中間，四面玻璃，感覺似响金魚缸入面，我哋一般朋友間聚會都還可以，如果係商務形式就唔係太適合。《霸王川莊》主打新派四川美食，我哋睇過菜單，比較過佢嘅套餐後，最後我哋選擇單點，始終叫食我哋想食嘅嘢，加上佢個套餐都唔係話特別平。茶就得一款，係比較少會飲到嘅「八寶茶」($22/位)，味道清香而且消濟，而且飲後唔會有口澀嘅感覺，好適合配搭中餐。雖然我唔係話太習慣用「蓋碗」飲，但我好少一餐飯唔叫其他嘢飲，淨係飲呢個茶，可想而知呢個茶响呢餐飯有一個重要嘅地位。湯羮我哋點咗三款嚟試，因為佢得3款選擇，我哋唯有點哂佢嚟試下，反正佢個湯羮只係一人份量。一：四川酸辣湯 ($78)佢個酸辣湯酸辣湯味道好濃郁，屬於偏酸果種，辣味係剛好，成個湯羮嘅味道有啲似五香肉丁，感覺非常特別。二：瑤柱鮮魚羮 ($95)我幾鍾意呢個湯羮，能帶出鮮魚味又唔會腥，雖然好似唔係好覺眼有瑤柱，但味道值得比5星。三：海皇三絲羮 ($128)三款湯羮最唔理想嘅一道，味道非常一般，有啲似開稀咗嘅蠔油芡汁，而且唔太覺得佢值呢個價。主菜方面，我哋點咗8款菜式，有「蒜泥白肉卷」、「甜奶迷你小饅頭」、「松露帶子賽螃蟹」、「霸王小籠包」、「烤北京片皮鴨」、「霸王松子桂花魚」、「黑木耳百合炒萵筍」同「四川熗炒土豆絲」，8款菜式都各有特色，而且味道都非常出色。一：蒜泥白肉卷 ($158)擺盤好精美，肉片內卷上薄薄嘅一片青瓜，配上蒜蓉同辣醬，味道十分突出，非常惹味；嫩滑嘅豬肉片加上爽脆嘅青瓜，非常有口感，係一道非常出色嘅菜色，特別是我是極討厭食手青瓜，都可以完全接受到。二：甜奶迷你小饅頭 ($62)好可愛嘅小饅頭，雖然細細粒，但佢都可以做到外脆內嫩，而且細細個好入口，呢個size係非常好，而且有14粒，剛好我哋一人兩粒。三：松露帶子賽螃蟹 ($188)好耐冇食過賽螃蟹，雖然明知係蛋白，但佢做到「鮮」嘅味道，而且好出色，佢有海鮮果種鮮味，呢種鮮味令我以為自己食緊蟹肉嘅錯覺，配上松露醬，令成個菜式提升到更高嘅層次。四：霸王小籠包 ($88)睇外表就知道佢個皮係偏厚，雖然係厚咗啲，但係佢入面有滿滿嘅湯汁，而且湯汁好鮮甜，肉餡亦好嫩滑唔柴。五：烤北京片皮鴨 ($598)我哋叫咗一隻嘅片皮鴨，暫時食過最好嘅片皮鴨，最好係佢啲鴨肉夠嫩，入口即溶，鴨皮亦烤得夠脆。餅皮做得夠薄同夠軟熟，係我食過做得最好嘅餅皮；擺盤亦好有心思，鴨肉圍住碟邊，皮就放响中間。配料有三款，都好足夠，畢竟係食鴨唔係食配料。六：霸王松子桂花魚 ($428)好大條嘅桂花魚，係一道唔易做嘅菜式，一般住家都唔會去做呢道菜。佢係原條炸，張開大口令人以為佢係活炸。魚嘅外皮炸得好脆，而魚肉竟然好嫩滑，魚香濃郁，點上佢嘅酸醬，感覺好清新且減低油膩感。醬有士多啤利肉，幾特別，雖然個醬係偏酸果種，但食落又好開胃。七：黑木耳百合炒萵筍 ($188)簡單清新嘅菜式，味道唔錯。木耳爽口彈牙，百合清甜粉糯，萵筍就保持到脆身，唔會炒得過老。整體調味清淡，食到食材本身嘅味道，好啱我呢啲懶健康嘅人。雖然冇咩花巧，但係一道實實在在嘅家常小菜，送飯都唔錯。八：四川熗炒土豆絲 ($158)呢道係我幾鍾意嘅菜式之一，我最愛土豆絲嘅爽脆口感，加上佢川辣嘅微辣風味，非常惹味，令人胃口大開。最後我哋點咗兩款甜品，「咱家擂沙湯丸」同「拔絲香蕉」。一：咱家擂沙湯丸 ($95)佢個芝麻餡有啲苦，而且帶有燶味，亦冇乜甜味，唯有向店員查詢，呢個係咪店家設計嘅獨特味道。最後店員收走咗並取消咗單，雖然有啲唔好意思，但佢個苦𤓓味都真係難以接受。二：拔絲香蕉 ($188)一個具視覺效果嘅甜品，好難得個拔絲可以整到咁高，非常之有心思。本身拔絲香蕉係一道比較普通嘅菜式，但佢整到成個鳥巢咁，變成咗一道功夫菜。香蕉嘅外層嘅糖衣，連埋香蕉一齊，做到外脆肉軟嘅效果，食落又唔會話太甜，真心讚。食咗13道菜式，基本上都唔錯，有機會都可以試佢唔同嘅菜式。🥢 霸王川莊📍 尖沙咀彌敦道63號iSQUARE國際廣場25樓2501號舖…查看更多
