影片
見屋企附近開左間星馬餐廳，於事走去試試，其實試新店都非常冒險，我有時都會預左，只要過得去我自己都會繼續幫襯，見証佢進步，但今次直情係中哂招，我都好耐未試過食完一餐係咁嬲。坐底后，水都無杯，店員工係度你一句我一句鬧黎鬧佢，我問左三次先肯比menu我，我點了個肉骨茶煲，點完之後竟然先後有另兩位同事再問我點了菜未，其中一位係之前同我落單果個。有電視睇，睇完一集同事三分親再加一節建築有情天，肉骨茶先到，等了大半個鐘以上，一煲湯加幾件肉洗唔洗咁耐，等到我非常肚餓，我一放落後超滾，肉骨茶好高溫即時燙傷我的舌頭，熱成咁都拿出黎，員工亦無話睇熱，白飯隔左三分鐘先送上，價值$75的肉骨茶的確唔足料，得三，四舊肥肉，無藥材味仲好多味精，非常唔抵。當時我睇緊電視，做到陳國邦幫楊碗儀還債，非常有戲味，我停哂手望住部電視，係呢個時侯，竟然有員工，伸左半隻手指落隻碟度問我仲要唔要，嘩....呢個時侯真係火都黎，我淨返三分一湯，六成白飯，好明顯係未食完，要趕客走都唔係咁嘛!!!我隔離果台仲離譜，起碼等左一個鐘碟海南雞飯，都一肚氣仲唔起身走咩，下次請都唔黎。埋單又係自己出去埋，去到收銀一聽到多謝$82.5，好似無講多謝添，唔係下話茶餐廳都要加一，無野下話。食後感: 食物差，服務仲差，簡直就係笑話。
繼續閱讀
想當年坐落响北京道嘅陳太星馬菜，今日竟重逢於北角七姊妹道一個不太起眼嘅地方內...以前响尖咀食過一兩次，不甚了了。對之印象最深刻嘅係佢哋嘅福建炒麵做得不錯....今次重開，搖身一變成為普通茶記。餐牌亦簡化許多，以前掛頭牌嘅娘惹菜及Rojak已不在餐牌中。始終响北角呢亭舊區開，一D不為舊區街坊熟悉嘅菜系，要放上menu始終係冒險咗少少...當然許多為人熟知嘅星馬菜式如炒粿條、肉骨茶仍然保留，但味道卻係極之令人失望...粿條查實就係我哋平時食開嘅幼身河粉。但上檯時發覺佢哋係用滲滲嘅做法--- 即河粉加米粉兩溝。對自己而言，反而更對口味。用上甜豉油炒，加入螄蚶、魚片及蝦，算不俗；但最關鍵係欠缺豬油香，螄蚶份量亦太少。需知好嘅炒粿條必備此二者，否則無異於普通炒沙河粉...肉骨茶更不消提--- 一D藥材香都嗅唔到，用嘅亦係豬手而唔係肉排，攪到成碗嘢油淋淋；又欠缺配菜如冬菇及油條，更遑論有炭香了。想起當年去馬來西亞帶隊，跟一班學生通宵睇完波後，翌日到酒店樓下嘅地道小店，邊食炭爐肉骨茶邊聊天，具往矣...太座叫個香茅豬扒炒麵。個麵被鹼水洗禮到完全唔食得，正式苦過DD；豬扒毫無肉味，不知所謂....唉...怪不得老舖响北京道經營多年終於失守。食眾嘅眼晴始終係雪亮嘅...但世事往往並非如此--- 新店開張一星期內其門如市，鄰座嘅少女不斷讚D嘢有幾好食得幾好食。聽後不禁搖頭苦笑...
繼續閱讀