阿拉麵館 (已結業)

預先電話訂位，佢地比左個窗口位我！都幾好view ！不過就嫌張梳化坐得唔係幾舒服，低左D，食野果時要伸正條腰骨至夾高度進食！前菜上得好快，但叫左幾碗麵，上既速度就好參差！朋友食完第一碗，另一碗至黎到，我叫果碗直情漏左單，最終CANCEL左！聽講幾好食既牛肉餅已經無左，無得試喇~~

以前都去過兩次，都要訂位或者等位，今次星期六晚上四個人去，都唔洗等，可能因為無咩人夠膽食，食左牛肉餅、砂鍋雲吞雞、芒果高力奶王、炒麵，個芒果高力奶王無之前咁好食，但我個friend 就話個牛肉餅好好味啦！

趁著呢期阿拉麪館無乜人，今晚去左食飯。吾知係咪想留客(成6點幾都係兩成入左率都無)，所以服務都幾好。今日食左個排骨菜飯，個排骨雖然賣相一般，但都幾好食。不過個菜飯就認真麻麻，一d味都無，無香味，d飯都係白色既(住家食d飯係黃黃地，有味架，天后就有一間做到咁既有味飯)。整體上覺得呢間野都ok 啦，特別係d茶都幾濃，不過如果要等位我諗我就吾會去啦~~~另，佢卡位d射燈"燦"親我....隻眼都幾"攰"......

裝修的確有心思, 一致的紅色頗住搶眼, 但食物真係不敢恭維~~ 不可說難食, 但不是太特別, 而且頗咸~~

琴晚同兩個friend又去呢度食野, for其中一個o既生日。我地order左(1) 醉雞- 細細兜, 密密食, 人人都讚好。(2) 芥末青瓜- 頗特別o既小食, d青瓜好爽, 加埋"供供地"o既芥末味, yummy yummy。(3) 麻辣排骨拉麵- d湯好似擔擔麵咁, 唔錯; 不過, d排骨就炸得麻麻地, 個賣相唔係好靚。(4) 阿拉生煎湯包- 好好味, 熱辣辣, d肉有肉汁。(5) 清真牛肉餅- 味道好似煎窩貼咁, 又係好多肉汁, 正。(6) 凍山楂茶- 最鍾意食有山楂o既野, 好似酸梅湯, 山楂餅。(7) 芒果高力- 比上次好食, 裏面冇一粒雪仔, 不過裏面用番豆沙好似好食d。今次餐飯食得好飽, 仲好開心tim。我會帶亞媽黎呢度試下。

經過見未有人排隊就進去試試。店內地方頗大，位置一直延伸到大廈玻璃窗。全內佈局優雅，以暗色調為主，設有圓檯、方檯及卡位。服務員態度亦勤懇，上菜斟茶等甚有效率！是晚點了：1)全盒菜飯--- 這是for二人吃的，內包括有菜飯兩碗及四小碟傳統上海菜式：賽螃蟹、炸排骨、豆腐及五花腩。2)辣椒皮蛋--- 小辣的辣椒豉油放上切開的皮蛋。3)口水雞--- 切雞件淋上小辣味的麻醬。4)上海粗炒--- 相對其他算是頗大碟的！5)脆響鈴--- 將腐皮捲成小卷炸脆，配上一小碟甜酸汁。6)津白--- 金華火腿放面的奶油津白。整體味道不錯，加上上菜快，碟碟熱騰騰的感覺很好~！離開時，外面已站滿等位的人了~~

朋友要指明唔食西餐, 係銅鑼灣兜兜轉轉, 結果都係呢度。已經無以前咁誇張要等勁耐, 但籌等位仍然係指定動作。好肚餓, 入到去已經叫侍仔埋落單。朋友想食辣, 一開波就叫麻辣菜式, 包括麻辣牛舌、麻辣粉皮、同麻辣麵。當然, 亦要照顧到我需要, 都有叫唔辣菜, 有黃金魷魚圈、蒜泥白切肉同排骨炒年糕。上菜好快, 都唔駛五分鍾, 菜已經得七七八八; 麻辣牛舌食落唔似牛舌, 可以用爽脆形容, 但面上麻辣唔算勁抽, 我食唔到辣都入到口, 講好食稱唔上。麻辣粉皮既麻辣醬較辣, 粉皮尚算彈牙。麵我無挑戰, 聽食果個講幾辣, 但好食咁話喎。蒜泥白切肉係廚師特選, 蒜泥果真係蒜泥, 一“pat”泥咁色醬將白切肉覆蓋住, 蒜香唔重, 但也可以。黃金魷魚圈係我次次都點, 雖然膽固醇超高, 但蛋黃香口, 不過就幾油。仲有個炒年糕, 排骨炸得香甜, 而且幾腍; 年糕都煙韌, 但大白菜唔算係最鮮甜囉。最後仲食甜品, 綠茶酒釀丸子同椰汁南瓜丸子。綠茶酒釀丸子係丸子有少少綠茶味, 酒味夠但桂花香稍弱。至於個椰汁南瓜丸子我就唔鍾意, 椰汁濃, 南瓜丸子有甜甜南瓜味, 但成碗好甜, 麻麻!服務唔錯, 二人檯有逼, 衰在要等位

上星期約左2個朋友，7:30 等到8:00 就可以入坐啦~仲要坐係窗口tim~~ 先黎叫左上海粗抄、生煎包、炸曼頭。上海粗抄及炸曼頭略為普通。返而生煎包唔錯！！加茶加得好密，哩樣要讚！我地叫左3樣野，坐左3個鐘，都冇趕我地走！又係要讚！總括：服務好好！唔會因為多人排隊而令服務變差！

上個禮拜四同d舊同事去試下銅鑼灣間阿拉麵館, 想睇下佢有咩吸引力咁多人排隊等食。起初估佢冇得訂位啦, 但係又唔係喎, 仲俾我訂左一張唔錯o既檯tim。我地張檯係晌間間房度架, 有plasma電視, 有海景睇, 環境確實一流。我地o個日叫左一個四禾食, 有糖醋魚、四小碟、花枝+蝦、炒蝦、果仁少雞粒、4 隻阿拉湯包、的"sik"醉雞同埋花芒果高力荳沙(希望冇記漏啦)。另外我地仲叫左兩個阿拉麻辣拉麵、生煎包同埋香蕉荳沙窩餅。我最鍾意食o既係醉雞, 唔好睇佢用好細個器皿載住d雞, 但係裏面d 雞, 真係食極都仲有呀。阿拉湯包同阿拉麻辣拉麵就麻麻地啦, 湯包d皮好薄, 一夾就爛, 攪到裏面d湯流晒出黎﹔d拉麵就唔夠《翡翠拉麵》o既麵咁好食啦。仲有令我地最失望o既係芒果高力荳沙, 唔係人地講o既咁好食, 仲有最奇怪o既係個高力荳沙裏面有一小粒雪。唔知係佢o既特色定係...總括黎講, 呢餐尚算ok啦, 食左700蚊度, 食佢d裝修都抵o既。

食物Ok!小籠包入面都多汁! 但係食個菜飯個煲就超大，但D飯就小左D law! 芒果沙翁好似好美味咁，後悔無叫到tim!

以咁high的地點、裝修，以及咁好味及多選擇的上海菜，吃得好d平均每人都係70元左右，如果普通d，40元樓下都已經有交易，例如一碗麵都有20幾元的（可以吃得飽），價錢真係超平。茶餐廳都係咁上下價錢。最正係佢d梅菜扣肉蓋澆飯，一流！仲有海景，商務應酬都唔錯。

約左個女仔朋大食晚飯,我地都覺得呢度d食物唔錯,份量又夠,我地兩個女仔叫左一個雞煨麪,一個菜,一個牛肉餅,已經好飽(因為個牛肉餅都幾膩)。值得一讚既係佢地既service。話說我同朋友掛住傾偈,碗麪放到涼晒都未食完,侍應斟茶時竟然主動問使唔使幫我地加d熱湯,我地話好,佢轉頭就攞左碗熱湯黎,真係唔錯!而且佢地加水都幾快架,環境又好呢!

收到King Parrot Group call 我話張會員咭可以攞得, 所以去攞咭時順便同屋企人食晚飯, 因為book 咗位, 所以唔使等. 其實我係呢到的常客, 每月都會嚟2至3次, 鐘意佢地座得舒服,食物亦都保持到水準, 又唔會趕客走, 所以一定要做佢地的會員睇吓有嘜Jetso, 不過discount得5% 實在太小啦!!! 叫做好過無啦!!!心水推介:醉八件醉雞羊肉+薄餅黃金入球老肉拉麵上海粗炒黃金魷魚絲芒果高力荳莎

早去多人等餐死不設搭檯,二人坐四位,舒服食物比預期好,甜同辣都好味,份量夠價錢合理

7月9號去試過, 晚上八點等到八點九. 有幸分配到非吸煙區, 但一樣聞到煙味！小籠飽又係皮厚兼唔熱,D肉料亦不夠幼嫩.香芹牛肉麵就俾佢呃左, 香芹及牛肉都係碎既, 薄薄一層鋪响面, 同食淨麵差不多! 個XX(唔記得)湯窩既賣相就與菜牌上既相片完全唔同! 我地直頭唔滿意呢間野!