金蘭花泰國菜館

營業中

休息中

久違了的九龍城，必食泰國菜。今次朋友介紹下揀咗去~【金蘭花泰國菜館】裝潢方面普普通通，我們2個人叫咗幾款~【串燒】牛，豬，雞只可選2款，我揀咗雞肉，牛肉，賣相唔錯，雞肉感覺比牛肉好些，牛肉偏韌。【馬拉盞通菜】這個味道比較普通，不夠咸香味，菜好新鮮，不過不失。【蝦缾】我至愛！蝦膠彈牙，唔錯！分量少少咁，2個人食剛好。【冬蔭公~蝦湯】細size是碗上，分量感覺比較少。材料都是蝦，磨菇，魷魚，薑，香茅，辣椒…等。香茅，薑味好搶，個湯都夠濃夠辣，整體都可以。【海鮮炒河】最遲來的一碟，但估唔到好好味喎！好夠鑊氣，用了粗身河粉來炒，不會散修修，海鮮大隻又足料，雖然都飽但全碟都可以食哂。唔錯唔錯！【三色冰】椰汁味濃，材料是大樹菠蘿，海底椰，泰式果凍，，等。好飲！總括而言，整體上~ 我好滿意，泰國餐廳來講，不算太貴，質素唔錯，推介！

筆者自問係咖喱迷，日本咖喱、印度咖喱通通唔會放過，今日就拉埋另一半黎左呢度歎泰式咖喱。先黎一個咖喱牛脷，厚切啖啖肉，質感強，有脂膏香，睇黎好講究廚師既功力，而咖喱既味道偏濃，辣中帶甜，仲mix左雜菜配料，幾豐富，D汁送飯一流，自然係一粒飯都沒得淨！然後點左個焗咖喱雞法包，打開個「包蓋」就見到入面裝滿咖喱雞，最開心係D咖喱汁浸晒入個包度，所以最後食個包係勁好味勁香脆！最後黎一客雜錦串燒，豬牛雞尤魚鬚一齊上，點埋個泰式沙嗲醬真係充滿泰式風情呢！

如果話夏天係食泰菜既季節，應該無人會反對，如果話食泰菜就要去九龍城，應該都唔會有人反對！不過咁多間點揀好呢，幾丁友行黎行去，兜左幾個圈，望到呢度入面都幾有人氣，一於入去湊下熱鬧啦！因為大家都好鍾情海鮮，所以一致同意今晚係全海鮮餐，四個人，一人點一款就最good啦，首先我毫不猶豫咁揀左個冬蔭功湯粉絲花蛤，因為老闆話花蛤呢一兩個月最盛產。咁又真係無介紹錯，食落果然特別肥嫩鮮甜，再配埋冬蔭功既香辣，好食到連湯都飲光！有朋友點左炒青口，因為加入左香茅、乾蔥同辣醬一齊炒香，所以食落又香又辣，唔錯。另一個朋友好特別揀左個叫炒烏魚扣，我真係完全想像唔到究竟係乜，原來係烏頭魚個胃，吹脹，乜連胃都食得既咩？估唔到口感係咁爽脆，食到嗦嗦聲，我開頭好驚會唔會好腥，好在係鮮而不腥啫。大家決定一人配一碗白飯，好滿足。最後出場既係鹽燒鰂魚，魚肚入面塞滿切碎左既香茅、南薑、香葉，唔怪得d肉有種獨特既味道啦，魚骨比較少，令人食得安心，烤出黎既鰂魚肉質嫰滑鮮甜，好有泰式風味。

呢排熱到噴火，同朋友游完水想搵啲開胃香口野食，卒之揀左佢屋企附近既泰菜館。有酸酸甜甜清新開胃既柚子沙律做前菜，入面有泰國金柚、菠蘿、蝦米同腰果撈秘制沙律汁，"泰"好feel。食肉獸必點炭燒豬頸肉，外層焦脆，內層充滿肉汁，彈牙爽口，點埋秘製泰式辣汁好好味。食肉獸以沙嗲串燒雞同牛延續落去，炭烤好香口，肉汁完全鎖住，點沙嗲醬或甜酸汁都唔錯。最後點都要有D澱粉質落肚先覺飽，炒金邊粉夠爽身，熱辣辣夠香夠醒胃，令人好想繼續食落去。整體而言：滿足！

去完泰國，對泰菜念念不忘，有鋪食泰菜既癮！就去左朋友推介既金蘭花試一試！個人認為入門食泰菜，一定要叫佢碟「泰式炒通菜」，試下佢既底子，如果呢碟炒得好味，就代表佢基本功做得好！果然，無令我失望，啲通菜好爽口，個醬汁都十分之野味！食泰菜點會唔叫「冬陰功」呀，呢到既冬陰功都好足料，最鍾意咁多海鮮，成個湯好鮮甜又帶點酸辣，好正宗！不過就有少少油膩，可改善下！仲有樣值得食既係，蒜子胡椒炒青口！本身超鍾意食青口，呢到既青口夠大隻，加埋呢兩樣材料同蔥花一樣炒，好入味，青口亦都好新鮮，timing都控制得好好，唔會炒到老曬好難咬，簡直係愈食愈上癮，一隻又一隻，差d想叫多碟食哈哈！價錢ok! 環境幾有係泰國既感覺，令得好掛住日日係泰國食泰菜既時候呀！

唉，公司入面最熟既同事今日遞左信，真係好唔捨得佢走......不過天下無不散之筵席，臨走前知佢最鐘意食泰菜，所以今餐就由我請，順便farewell啦！同事想食香口野，揀左個香葉包雞，斑蘭葉既香氣滲左入雞肉裡面，加上有泰國菜獨有既青檸\同魚露調味，佐酒就正，平時少飲酒既我地都叫左啤酒盡興一下。之後黎左碟乾炒雞肉貴勺，有港式乾炒河粉既口感，混埋雞肉、蛋花同菜苗大兜亂，幾有泰式風味，夠鑊氣！當然要叫返個菜平衡下，呢個炒椰苗簡單清新，椰菜苗即係最鮮嫩既中心部分，所以食落特別覺得鮮甜爽脆。烏魚扣即係烏頭魚個胃，口感非常爽脆，經香炒後更加脆口彈牙，帶香辣令人食上癮咁。希望個好同事前程錦繡，以後食餐泰菜都會諗起我啦！

中學同學聚會好耐無同中學同學見面！為左隆重其事，突登入左9龍城食泰國菜！見呢間金蘭花幾多人，裝潢又幾靚，就入左去試下喇先黎生菜包，啲生菜好爽口，豬肉碎配埋辣椒洋蔥，辣度適中，仲唔會好油膩（出面有啲炒到好油我唔係咁鍾意)！包埋生菜一齊食，一咬落去bit曬啲汁出黎，實在太正喇！再黎馬拉盞炒通菜（我地叫左大路野試下先）。一樣無令我地失望，鹹度適中，爽口入味，好快就比人搶曬黎食！仲有焗大法包配咖哩雞都係好值得推介！個包可以點入面既咖哩黎食，估唔到又幾夾！啲咖哩唔算好辣，仲好香椰汁味。雞既份量可以再多啲。叫包送左杯椰青水飲下，又幾抵！服務態度好，啲職員都係泰國人黎，好有身處泰國既感覺。環境都幾舒服。野食味道正宗而價錢合理，幾值得推介呀！

近期朋友gathering，黎黎去去都係火鍋同韓燒，真係就快悶死喇 >.< 所以今餐我決定爭取返個發球權，帶佢地去食泰國菜，仲由我發辦添！咁就首先黎個清新既柚子沙律作為前菜先啦，酸酸甜甜非常開胃，仲有d蝦米仔同花生點綴，撈埋一齊食，口感唔錯。之後就係冬蔭功，一睇已經Feel到好濃，飲落勁辣加勁酸，入面既蝦都彈牙好食。飲到底見到有好多香茅同香料，非常足料~ 在座個個都添飲。跟手就係熱辣辣超香口既醬爆蝦丸登場喇！脹卜卜好想大大啖咬落去，外層好脆口，入面有蝦膠加蟹籽整成既醬，好有層次好惹味。再黎一客糯米雞翼，，起晒骨啖啖肉既雞翼外皮炸到好香脆可口，裡面釀入軟熟糯米，雙重口感，少D準備功夫都唔得！一上枱班餓鬼就搶住食，只能影到兩隻無左一截既雞翼 最後係焗咖喱雞法包，見到D咖喱汁同雞肉多到好似就快爆出黎咁，令人心情相當興奮，泰式咖喱同其他咖喱真係好唔同，係食得出入面用左好多唔同既香料整成，雞肉都幾嫩滑，臨尾仲可以食埋成個法包落肚，飽晒啦！

之前行街多數食日本菜，韓國菜或者西餐，巳經食到厭。近來愛上食泰菜, 喜歡果種酸酸辣辣既感覺。問過朋友，佢叫我試下九龍城呢間老字號金蘭花，於是放工去左呢間食。‧冬蔭功朋友叫我必試呢度既冬蔭功，我叫左碗細既。個湯睇落好濃咁。飲一啖試下，WOR~ 即刻愛上! 香茅味好重好正，酸同辣都好夠勁道。成個湯好多香料浸住，D蝦Size都夠大，湯又夠濃郁，真係真材實料！曾經去過幾次泰國玩，覺得呢間既冬蔭功仲好飲過好多泰國果邊既餐廳。算我朋友無介紹錯啦~‧炒椰苗泰國既菜，賣相翠綠，食落爽口，蒜蓉味都幾惹味。OK~‧泰式生菜包生菜食落都新鮮爽脆。肉碎炒得好香又唔會好肥。食落去又係我最鍾意既酸酸辣辣，好開胃。生菜包住肉碎食，食完一塊又一塊都唔唔覺飽。最後我連墊底果塊菜葉都食埋。‧醬爆蝦丸一上枱仲感受到果種剛剛係油度炸出黎既熱度。賣相已吸引，大大粒又脹又飽滿。侍應提我咬果陣小心中間D醬料好熱，於是我先咬開一個細洞，慢慢啜下，入面個醬熱辣辣好濃好香，有好多一粒粒應該係蟹籽既野好有口感。蝦丸表面炸到香脆，入面果層蝦膠好彈牙好有咬感。值得一試~‧金邊粉炒得幾有鑊氣，夠乾身唔油膩，入口彈牙，甜、酸、鹹咩味都有齊，仲有花

忽然想食泰國菜，走左去九龍城行左一轉，以前食開果幾間都水準下跌，今期搵間新野試試睇下有冇驚喜先？驚喜就真係冇乜，因為以前食開果D泰國茶D水準真係好好，落足香料煮就已經好好架喇！先講個午市套餐，冬蔭公雞肉湯金邊粉，完全唔得，湯係用冬蔭公醬間嘅！什麼香料都冇落，同係屋企煮個 MaMa 麵個湯都好過佢！呢個香葉肉碎炒河就唔同喇！甜甜辣辣，落足九層塔，好味！至於呢個鉄板蠔仔蛋.............大家睇相想知唔得啦！煎到成塊咁，仲要得中間部份先有蠔仔，一個字“差”！泰式生蝦，炸蝦頭脆脆地幾香口。但泰式生蝦最重要個汁，平時食開果D係綠色嘅個汁，但係呢間.....佢搞咩呀！居然比個酸辣雞腳汁............整體來講都好唔得，整係個炒河OK！依家想搵間好嘅泰菜直係咁難？

幾年前同大學朋友仔黎食，覺得佢比小曼谷，金寶都好，可以小舖做野夠集中呱，仲記得果時食嘅醬爆炸蝦丸，蝦餅都好香好彈……好可惜4月頭去完之後，我要作出我第一篇嘅「一般」食評~冬蔭公湯，唔辣唔酸唔香唔熱…………唔知佢想點泰國菜必食生蝦，冇左陣冰凍新鮮味，但都幾甜嘅~~炒大蜆，老老豆豆，d肉就唔見晒~主腳之一， 醬爆蝦醬，冇左陣咸味同蝦餅味串燒…………唔熱，醬汁亦冇特別…………呢餐…………唔嬲嘅，不過以後仲話去九龍城食泰國野我就未必即刻諗起你囉~

周末一家人到九龍城睇家品，順道吃晚飯，不知為什麼，雖然這裡的食肆種類繁多，但大家仍有那種「來到九龍城就要食泰菜」的想法，於是就選了這間老字號名人飯堂。我們點選了燒豬頸肉，煎或焗也比不上炭燒，瘦中帶肥，口感爽脆，配合泰式辣汁是一流；炒通菜不會一味得個咸字同重口味，而是食到馬拉盞同香料味；生菜包的生菜幾爽甜，包起洋葱、辣椒和豬肉碎來吃，酸辣醒胃；海鮮炒粉絲初放入口時味道不太辣，但幾秒後辣味就湧現，非常過癮，最難得是海鮮的數量出乎意料的多；泰式鳳爪同柚子沙律都是必點小食，每口都包含酸、辣、甜幾種滋味。服務方面，泰籍姐姐侍應幾Nice，上菜速度快，整體而言是不錯的選擇。

啱啱過去嘅冬季食咗好多次枝竹羊腩煲，因為暖身又惹味，估唔到今日同朋友嚟到泰國菜館，竟然都可以食到羊肉鍋，好有驚喜！泰式羊肉鍋：同中式枝竹羊腩煲味道相當唔同，泰式係貫徹酸酸辣辣嘅味道，越食越開胃，成鍋點住火上枱，熱騰騰滾住食好過癮；羊肉都相當大塊同嫩滑，鍾意食羊嘅朋友一定非常滿足！糯米雞翼：雞翼賣相飽滿，雞皮炸得香脆，入面嘅糯米飯軟硬適中，口感十足，味道一流！乾炒金邊粉：經典泰菜之一，入口先嘗到濃濃嘅甜味，之後酸味一d一d咁滲出，跟住魚露散發咸鮮，最後係香料嘅辛辣，味道超豐富。炒椰菜苗：外國人通常用佢黎做沙律菜，泰式整法就用魚露代替鹽，椰糖代替白糖，混埋辣椒同蒜蓉一起炒，菜嫩味香。

每次去泰國旅行都要吃個夠、吃個瘋狂，因為當地美食實在正宗好味又經濟，好彩在港也能找到價廉物美又夠地道的泰國餐廳滿足口腹~在泰國必吃的當然是生蝦刺身，即剝即食特別爽口鮮甜，而這裡的生蝦刺身肉質緊實富彈性，配搭泰式醬汁更能提升虎蝦的甜味，認真食到lam lam脷~我每次食泰菜都必點串燒。呢度有豬、牛、雞肉、魷魚鬚、雞腎同雞軟骨揀。我地叫左6串，串燒嘅肉有彈性仲有肉汁，食得出好新鮮。而點串燒嘅沙嗲醬味道又香又濃厚，好有風味，極似泰國街邊食到嘅味道，係呢度值得一試既小食~這次還點了招牌菜咖喱炒蟹，螃蟹夠大隻肥美，味道香濃不會太辣，價錢亦相當經濟，難得難得~芋頭海鮮飯比人感覺好足料，面層嘅海鮮同冬菇舖得又厚又滿，個醬汁同d料都幾夾。底層係炒飯底加大大舊嘅芋頭粒，芋頭每舊都好香同好粉，食落夠晒飽肚， 呢個飯充滿唔同嘅味道，好有層次，食落滿足，抵食~泰式炒通菜入面有好咸香豆辦醬味，通菜食落夠嫩唔老，合格；而椰青夠大個，入面多水飲，形狀四正，靚過好多其他泰菜館嘅貨，28蚊個都算平~

見天氣凍凍地，就約埋兩個friend去食啲「刺激」嘢暖下身，講緊嘅就梗係食辣嘢啦！而辣嘢嘅首選毫無疑問必揀泰國菜，問問同事意見，有人推介我哋嚟呢度食~見到店內嘅侍應姐姐都係泰國人，感覺食物都會夠地道~首先叫咗個冬蔭功，個湯頭可以話係集合咗酸、辣、甜、鮮同香嘅味道，飲得出非常足料，天寒地凍時歎番一碗香辣熱湯，真係開胃又暖身~！之後上枱嘅係豬頸肉，件件都燒到好香口，肉質帶韌性，食起嚟好有脆度，先食一件唔點汁，再食一件點辣汁，唔怕辣嘅人真係要試下，因為辣得好惹味，仲越食越開胃，令人忍唔住一件又一件咁送入口~yummy~再嚟嘅係爆炸辣蟹，佢有d似避風塘炒蟹，炒得極度香口，螃蟹都幾大隻，蟹肉相當入味，殼亦炸得好酥，個個食到狂啜手指無晒儀態，哈哈~臨尾食埋個泰式炒飯，入面有好濃嘅金不換葉香味，令人食慾大增，炒飯粒粒分明，食完好飽又滿足~