影片
外父大人及舅仔不約而同說這兒很抵食，甚麼叫一碟龍蝦配伊麵底加一大洋就可以點多一味指定小菜....另外還道叉燒皇的水準非常的不俗....說得我和太太心痕痕，決定要擇個日子一齊再去食番餐....終於在屢約不到之下，最後都能找到個日子去幫襯。但怎知搖個電話去一問，竟發現那一蚊小菜優惠已結束....唉，此時唯有只去點些其他的，再加埋那碟叉燒皇，當成吃普通的晚飯小菜好了....時值週末六時多踏入店中，差不多是尤如包場一般，假期的生意也淡泊如此....這亦難怪的，就在商場一步之遙就有另一間連鎖集團的酒樓。一個如此小的商場就有兩所酒樓，做的又是附近街坊的生意，週邊同樣有不少一家人出外叫餸食飯的選擇。那麼這裡生意之難做，也就不難理解了....坐低後第一件事，便是先看看有甚麼特價嘢。給太太喵到一個深海龍躉二食連兩只乳鴿的優惠，盛惠$328的確算是值吃。另外加埋叉燒皇，一碟清炒菜心以及同樣便宜了的白灼海蝦，份量實在相當夠....叉燒皇及乳鴿同屬燒味部的出品，出菜的速度自然比小菜類快。叉燒皇看上去蠻對版的....不過一睇它的剖面後心裡便沉了一截....一喵便知叉燒是偏瘦了。咬將下去肉是未夠軟熟帶硬。儘管蜜味甚濃確容易催使人可以扒多一口飯，但如此的肉質，要稱之為皇的話實在很難說得過去....乳鴿是太太指定要點。肉不算厚身同樣偏瘦還帶點柴韌。此時忽然想起剛解甲歸田的"楓林"，不禁莞然....炒菜心油光滿面如同照鏡自是理所當然。幸好菜本身未算太老有渣，還吃得下的....龍躉兩味例牌打頭陣的是炒球。現在許多酒家都說甚麼炒斑球，但食到的往往都是普通斑片而已....始終要弄斑球需要講求刀章及火喉，而且最重要是要花時間。等閒普通酒樓又怎能做到 ? 幸好今天在吃到的炒斑片還可以，肉沒過了火質地實淨味不過腥，皮厚身仍保持Q彈已是可貴；伴碟的西蘭花儘管只是灼熱但仍維持翠綠爽脆....蒸頭腩最大的問題是一大堆油置於碟底下。蒸的還比炒的更多油，不是有點兒匪夷所思嗎 ?最後的結果便是食完後馬上要跑進洗手間了....灼海蝦算是全夜最似樣的....親眼目睹蝦從水箱中撈出來然後拿進廚房，之後換來的便是色澤帶微粉紅，肉質實淨而鮮甜的蝦肉了....押尾例牌端來一碗紅荳沙。雖沒有甚麼陳皮味但紅荳好在已被煑淰，甜度也沒太OVER....聽得許多有關的抵食而價廉物美的讚賞，如今親身來試卻換來極一般的水平，失望自是難免的....
繼續閱讀
屋企附近的商場，無意中發現呢個龍蝦伊麵套餐都係只需＄168就有，加多1蚊有多個小菜，認真抵食！打算求其食個晚餐，抱住一試的心態就入左酒樓了！場內不算多人，所以好快就有得食了！吾食由自可，一試真係有出奇的驚喜好食！！以168元來講，味道真的不錯！唯一可惜就係蝦比較細隻，肉好少喔！好彩有個伊麵底頂一頂肚，伊麵都好吃味道不錯架！另外，加一元有多一個小菜，精明眼的我當然要追大啦！吾好蝕底加左個京葱牛仔肉，意想不到的份量十足喎！牛肉好多夠軟滑，不過味道就過咸了，用來送飯都好既，可惜兩個人的晚餐來講真係太多了！總括來講，抵食行先！呢度係一個吾錯的選擇喔！！
繼續閱讀
一間唔起眼既酒樓，位處翔龍灣，門口細少，同一般酒樓門口相比，門口細得可憐。同一個商場有海港酒家，級數完全唔同，而且都食過幾次，有保証。家人話想試下新野，心諗一餐便飯，馬馬虎虎算了！望一望菜牌，為煌府集團一員！老豆左睇右睇，最終都是點了佢至愛之一，龍蝦！是日特價168蚊，加拿大龍蝦尹麵底，加一蚊可再加一個小菜，我地點了生炒骨！人客唔多，上菜快，一黎就是菜芯及生炒骨。夾左一件生炒骨，獻汁稠過濃，最唔鐘意獻汁結似糊，不過炸得還算香口，兼且肉排大大舊，小肥多肉無骨，而且唔係雪到乾晒既貨色，除獻汁唔好之外，算係交足功課。再黎上湯加拿大龍蝦伊麵底，一般呢D價位，都係有得睇，無得食，龍蝦得個殼，肉得兩件！不過今次又唔係，肉份量多，食極食唔完，雖然唔係大大舊，但係食龍蝦都半飽。而且蝦肉彈牙鮮味，絕對超值。我地三個人叫三樣野都好夠，但係又口痕，加左個皇牌叉燒，心諗都係一般酒樓燒味貨色，唔會有咩特別。一上黎，買相唔錯，一D 唔馬虎，份量亦足，叉燒汁又淋得夠多，夾一件睇，居然係肥瘦適中既靚梅頭貨色。入口淋得黎有小小咬口，唔會好梅又唔痴牙，叉燒味香濃多汁，絕對係酒店級中菜廳水準。 最後敬送紅豆沙，紅豆起沙，但陳皮味不足。人又唔多，唔會好嘈好迫，今晚一定三口都食得甚為開懷，仲要打包！整體黎講係好味同有驚喜…
繼續閱讀
偶爾過土瓜灣探望老媽，都不想老人家操勞，近近地出街食，而閒日的逸豪軒，晚飯時間都不難找位。上湯焗龍蝦配伊麵底伊麵最受小朋友歡迎，幾乎消滅了一半，龍蝦肉泡過油，肉質爽彈，也好，來一杯啤酒慢慢嘆。珊瑚蚌帶子炒西蘭花西蘭花脆嫩；帶子軟腍；珊瑚蚌爽口；但幾款食材各自為政，將一道常見的菜色弄成「家破人亡」，貌合神離，真是難以想像。菜胆冬菇鮑片如果用生菜底會更喜歡，小棠菜有點不搭配，冬菇肉厚，幸好芡汁夠薄，沾上了剛剛好。清蒸海班當然是養班，似乎蒸得過熟，肉質有點粗糙。壽包非常大路，不過蒸得熱辣辣，食落包皮軟熟，還是不錯的。始終是街坊生意，食物及環境都好大路。
繼續閱讀
又到母親節晩飯，一家當然去酒樓食套餐。被安排坐主家席位置，冷氣超凍，要求調校下，waiter的回覆是"唔調得"，原來成間酒樓得一個制控制冷氣？成晚凍死人，只怕小朋友凍病，又唔可以返學 。服務又唔好，要個盒打包食物，放不入，回答好"專業"，"是這樣啦！"，話知你。總之成晚食得唔開心 。最後仲要求Tips!
繼續閱讀