辣媽川湘私房菜

營業中

休息中

今日同朋友特登嚟呢度識佢嘅🧡酸菜魚晏晝嚟有套餐食，價錢平，非常親民🍽餐廳環境非常大！所以佢哋都係自動用手機下單！方便大家✨酸菜魚份量夠晒加，而且味道非常好味又特別！肥腸嗌咗個中辣，超級惹味香口蒜泥白肉麵，出邊真係食唔到！賣相吸引又特別！食落去超級涼爽！因為係冷麵底！整體來講值得入嚟食一次！佢哋都好多人排隊！可能因為晏晝食飯嘅關係～下次再入嚟元朗一定會再幫襯多次🤤❤️酸菜魚套餐🧡肥腸💛蒜泥白肉麵

最近又去搵酸菜魚食 去到元朗搵左呢間辣媽試下 呢間有招牌酸菜魚 有多款川菜美食選擇入到去大部分係鮮紅色卡位 坐得很舒適👍🏻🐟酸菜桂花魚 餐牌寫有「強烈推薦」一定要試下今次叫小辣🌶 一上菜聞到香噴噴魚片大塊又嫩滑的 無碎骨配有幼滑粉絲 吸埋d湯味道好正 個湯底唔會太咸 餸飯食一流呀🤤真係要推薦比大家 必食之選😁🐔經典口水雞辣油好香 灑上炒香既芝麻雞嫩滑 浸住辣油 味道很好🍚午餐肉炒飯午餐肉粒煎得好香口 飯粒夠乾身

喜歡吃辣的朋友可以試試有lunch set 小菜 有湯有飯 cp值高當中特別推介酸菜魚 味道濃 酸辣味平衡 魚肉份量多 肉質熟喜歡素食 也可以試試炒豆角夠鑊氣 又夠辣口水雞好味 但份量就比較小

每次經過這一間川菜都很多人排隊，今日得閒就試一試。排隊時間大約等了45mins，雖然等得耐但係絕對值得🤭由於疫情呢幾年都冇得返大陸食酸菜魚這一間絕對可以止渴。酸菜魚必點的份量多而且魚肉的鮮嫩伴隨著酸菜的香氣和口感，味道特別的鮮美。豬手；完全做到皮脆肉亂滿滿骨膠原感水果茶；分量多裏面滿滿的生果。

元朗有好多間川菜餐廳，呢間人氣都算高企，每次晚市經過都見人排緊隊，一於試下推薦菜式。酸菜桂花魚$189/例｜小辣呢度既酸菜魚選用桂花魚，魚肉食落都幾嫩滑，不過有少少骨，食既時間要小心d，味道都夠酸，但唔算好麻辣香口，湯汁偏油膩，寬粉夠煙韌，係厚左少少。例牌大概係半條魚，酸菜魚份量比較少。膠原脆皮豬手$98/5舊必食推介👍🏻豬手炸到外脆內軟，外層佈滿辣椒孜然等香料，少少辣，夠晒香辣惹味，內層食到煙韌有咬口既骨膠原，真係要戴手套用手揸住食，先食得爽快😋整體來講，川菜味道同賣相都算唔錯，特別係豬手，缺點係偏油左d，價錢略貴，同埋walk in要等得比較耐，建議book定比較好。好味：4/5環境：3.5/5客服：3.5/5

我諗住元朗好多人都食過呢一間🤔呢間如果鍾意食重口味既野絕對啱你食🙆🏻‍♀️不過要預咗要排隊😅因為真係幾多人下⋯呢一餐我哋叫咗酸菜魚、乾鍋土豆雞、炸藕餅、炸饅頭、擔擔面👅而飲品就叫左 至尊水果茶，金橘青檸特飲❤️酸菜魚：湯頭味香濃，酸味啱啱好，同埋最緊要啲魚好滑身冇骨👍🏻乾鍋土豆雞：我覺得呢個太油膩，啲雞冇咩特別⋯可以唔使叫😂炸藕餅：啲炸粉唔會過厚，炸得好脆卜卜👍🏻炸饅頭：新鮮炸起，熱辣辣好好食呀🫶🏻擔擔麵：冇咩特別🤭🤭不過啲汁都OK好味🙆🏻‍♀️至尊水果茶❤️成杯都係滿滿嘅生果😂 讚喔❤️金橘青檸特飲：酸酸甜甜幾好味🙌🏻總括嚟講呢間嘢好多都係煎炸嘢，用大量油整既菜式，其實都幾油膩，重口味😂 如果鍾意食清淡少少嘅人絕對唔啱食🫣🫣

今次山長水遠到元朗，朋友話呢間餐廳非常出名嘅左好多分店！咁就要試下佢啦～去到應該因為星期六假期既原因，超！級！多！人！然後發現原來GULU app可以攞飛，早知一早攞定啦 我前面有20 幾個人等緊位。好彩出面準備左好多凳比walk in客等～都等左成45分鐘....因為其中一個frd唔係好食得辣，所以order啲菜色都走辣或者bb辣對於我黎講真係有點難受同失望，品嚐唔到佢真正味道。芥辣魚皮 $59涼菜黎講幾特別，非常值得試！魚皮好有口感，而且唔會腥再加埋芥辣好開胃。酸菜鱸魚 $189魚肉都好滑同份量都多，但酸菜相對比較少。平時會有芽菜的但呢間冇，仲有少量粉絲。湯頭正常冇話好特別，價錢同味道都值得食的。火爆腰花$99因為走左辣既原因所以冇乜色，變左個普通小炒咁。但值得讚既係，一啲異味都冇，處理得好乾淨而且好嫩，非常好送飯！如果加返啲啲辣應該更加好食！手撕包菜 $??呢個應該漏單，差唔多食晒先上到黎....然後完全冇味！係油+菜得味道見佢地好忙原本想cancel算 佢係都要我轉其他菜然後就轉左乾煸四季豆 $69味道都唔錯，都好入味同埋有鑊氣既。但因為都食飽先上所以最後都浪費左總結黎講係正常

成日聽朋友講「辣媽好食！辣媽好食」今次放假特登帶埋鍾意食辣嘢嘅朋友 去淺嘗一下😌 真係無失望喎( ´ ▽ ` )ﾉMenu寫住酸菜魚「非食不可」，咁就真係要嗌嚟試吓啦😚酸菜桂花魚~ 🐟💰$189/例💰$299/條我同朋友兩個人 嗌咗例牌，份量都唔少 仲有粉絲墊底 好飽肚！魚塊好滑冇骨 啱晒我呢啲懶人🤓酸辣啱啱好 忍唔住係咁飲啲湯(⁎⁍̴̛ᴗ⁍̴̛⁎)真係非食不可喎 must try try ~

住元朗的朋友説這間川菜餐廳好好食，今日就專程入元朗試試，餐廳環境寬敞舒適，平日中午時段去到已座無虛席，餐廳用電子落單，十分方便，辣度有不同級數選擇，由走辣到大辣，適合各人口味，十分貼心！酸菜鱸魚飯午市套餐一人份量的酸菜魚，價格超值，魚肉挑選肉多刺少既鮮鱸魚，魚肉切得大片，肉質鮮嫩香滑入味。膠原脆皮豬手外皮炸到脆卜卜，肉質又軟又滑，煙韌彈牙，滿滿的骨膠原，灑上孜然粉十分惹味。芥辣花螺螺肉很彈牙，微微的芥辣味，不會很攻鼻，配青瓜食真的很開胃。蒜泥白肉涼麵腩肉肥瘦分明，包住青瓜片食落口感更豐富，也可解油膩，蒜泥伴涼麵醬汁味道也配搭得很好。椰王燉雞原個椰皇燉雞，湯料很充足，湯底雞味濃郁，散發出淡淡的椰子香，飲得出真材實料。涼拌手撕雞手撕雞皮爽肉滑，配麻辣汁十分香口。至尊健康水果茶整杯水果茶都滿滿水果，有西瓜、橙、士多啤梨、奇異果、熱情果等，味道非常好！粒粒芒果沙冰芒果味濃郁，夏天消暑解渴！

呢間絕對係食辣/重口味人士必試嘅店！餐牌上面好款菜式都想試！水煮魚好味！！魚超滑的！辣得黎又好香❤️入面仲有啲薯粉！份量都好足！口水雞朋友唔係好食得辣，要左少辣咋！我覺得唔夠辣，冇計啦要將就下朋友～雞滑嘅！醬汁係正！蒜泥白肉有啲涼麵拌碟，撈埋醬汁食幾好！蒜泥白肉我朋友就話麻麻，但我就覺得幾好味喎🤔清炒萵筍絲爽口，輕微辣，好食！孜然牛肉超惹味的！！薯仔夾埋牛肉食真係絕配呀！單單係呢個餸我就可以食到兩碗飯！

朋友介紹左一段時間今日突登入左元朗去試依間辣媽6點半左右去拎飛，都要等20張飛炸豬手外脆內軟，濃郁孜然香味，要襯熱食蒜泥白肉擺盤精緻，但味道欠逢，得個油🥲酸菜炒肥腸十分入味，非常好送飯，酸菜味適中，肥腸不會有騷味毛血旺有八爪魚，鴨血，午餐肉，寛粉等等味道一般，而且偏油酸菜魚味濃，魚滑無骨，酸菜味道好，夠熱湯底還有粉絲，非常飽肚忍唔住會飲幾啖湯炸饅頭雖然好多地方都有，但依個饅頭係數一數二好食！！熱Laklak, 外脆但內裡非常鬆軟！仲要唔會食完食口油！明明已經好飽，但都食到兩個，十分推薦！依杯水果茶少甜少冰都係恰到好處！所有水果都好新鮮，酸酸甜甜，冰冰涼涼，令到個人好開胃都好解辣4人食左980蚊左右，全部人都好滿足，價錢合理

特登入去元朗去食辣媽，之前係朋友介紹嘅，一試難忘。大概六点鐘等位七點幾先有台，經理話廚師全部都係四川人老闆係香港人，同行有四川嘅小夥伴，一齊試下正唔正宗。芥末魚皮 好好食 四川人都好食到講粗口毛血旺料好足 除咗平時d食材竟然仲有大腸 水煮桂花魚 唔錯下 魚肉嫩滑酸菜鱸魚 十分之驚喜 用炸蒜鋪面淋油 酸蘿蔔酸菜都好正 鱸魚同桂花魚片一樣都係甘滑膠原脆皮豬手好大舊三個人食唔曬 表皮好香脆 入面嫩滑有嚼頭乾鍋脆肥腸好好食 有少少脆卜卜又唔會好辣田雞味道有少少唔夠鹹 肉質嫩滑 賣相同四川差唔多加酒水 人均五百

辣媽湘川私房菜❤️特登揸車入嚟食❤️呢間餐廳食過一次留下深刻嘅印象決定今次再嚟食！椰王燉雞（$59）🥥🐓真正椰皇燉雞，湯料很足，湯亦都不混濁！湯散發出淡淡嘅椰子香，好有濃郁嘅雞味，飲咗少少湯刮埋啲椰肉落嚟一齊食真係好夾，呢個價錢絕對係值酸菜桂花魚小辣（一條$329）🐟🐟🌶🥬唔係講笑個湯真係好好飲，濃濃嘅酸菜味好鮮甜，魚好滑亦都好厚肉，魚頭亦都有炸過，撈粉絲真係一流水煮田雞（$118）🌶🐸🐸田雞唔太新鮮，肉質爭少少，不過個味道真係唔錯撈飯真係好正誘惑香鍋（$169）🐙🦐🐸🥔🥦🧅包羅萬有，魷魚，薯仔，豆皮，花菜，蓮藕，蝦仁，辣汁好惹味，但係味道唔夠濃，但係比出面就到已經好好食芥辣魚皮($59)🐠芥辣味好重，魚皮夠凍，食落爽口，我就俾啲芥辣公道好精神😂芥辣花螺($89)好新鮮，肉質彈牙，辣汁配埋啲青瓜食真係好開胃呀火爆腰花（$99）味道好突出，炒得好有鑊氣，完全冇內臟嘅味道，炒嘅時間亦都拿捏得好好乾煸脆肥腸小辣（$98）肥腸真係脆卜卜，辣又唔會太辣，豬大腸嘅份量都比較多，好啱作為小食或者撈飯都可以扁四季豆（$69）肉碎嘅鹹味同四季豆好夾，雖然鹹咗少少但係有白飯一齊食就啱啱好清炒萵筍絲 （＄78）

平時食開一味泡椒田雞仲要係攞走嘅今次可以坐低試下 6:15攞飛都要成7.0幾分先有枱 下次要再早啲先得 用餐時間個半鐘泡椒田雞即場食仲正 個豬手都係牙籤羊肉冇乜特別油左啲串串蝦非常之油雖然肉爽但唔建議食有驚喜嘅竟然係個炒花甲 係不錯 肉又大粒個人覺得比大排檔好食 😋🙈芒果沙冰好香芒果味 解辣一流整體唔差 但係比較油啲 一次半次冇問題😅

我哋以前介紹好多朋友過嚟呢間餐廳食, 但係一次比一次嘅服務態度差， 裏面啲人做嘢七國咁亂， 唔識做服務性行業就返屋企休息啦， 我以後唔會再介紹其他朋友過嚟呢度食㗎啦。失望