越館

營業中

休息中

同幾個朋友嚟到安寧路，見到有間越式餐廳就入咗去食飯，天氣熱熱地，食返啲酸尾尾嘅都應該好開胃。入到去先知道呢一間餐廳係啱啱新開冇幾耐，入邊嘅環境裝修都幾有特色，同埋好闊落，至少唔會灰灰暗暗咁。我哋嗌咗個香茅豬扒湯河，越式雞扒撈檬，越式串燒豬肉湯河同埋一個越式雞扒包。豬扒湯河個湯都好清甜同埋有啲香茅嘅香味，豬扒煎得外脆內嫩，咬落又唔嚡，一啖豬扒一啖湯，好開胃。雞扒撈檬就加埋啲醬汁酸酸地甜甜地，加埋個雞扒都好嫩滑，仲有啲生菜同花生碎，食落個口感都好豐富，提一提佢個檬粉好爽口好食。串燒豬扒湯河啲豬肉串燒得啱啱好，冇燶到，同埋嗰個炭香味好夠，好似食緊串燒咁，食落又好嫩滑。個雞扒包都好好食，包皮好脆，然後雞肉又好嫩，同埋好多汁咬落去仲有少少汁bit咗出嚟，如果呢一個包係一個早餐再加埋杯咖啡一定好正，嗰日一定係滿滿嘅正能量。嗌埋兩杯嘢飲，青檸紅茶酸酸甜甜好解膩，雖然有啲似凍檸茶但係佢用嘅係青檸，再加上嗰種茶嘅香味，配合得都幾好。仲有杯椰汁冰，好香濃嘅椰子香味飲落清甜又唔會好甜，味道啱啱好！總括嚟講呢間越南餐廳都算係好地道嘅，可以試一試。

近排屋企人喺元朗見到呢間越南餐廳新開，買咗份外賣香茅豬扒法包+豬頸肉湯河，食咗之後覺得質素幾好，所以今次專登嚟堂食試一試。今次朋友仔食越式豬頸肉法包，我就食雞扒撈檬粉，飲品跟餐半價。睇完餐牌覺得有啲奇怪嘅就係小食同檬粉一樣價錢嘅？小食嘅香茅豬扒$50，但係香茅豬扒撈檬都係$50🤣份量有冇唔同我就唔知道喇，不過我叫咗份雞扒撈檬，份雞扒一啲都唔少喎🤔朋友仔原本仲話同我share,點知食完半份法包之後，佢覺得好好食，連淨低嗰半份都食埋，我就試咗一塊豬頸肉，雖然唔係特別脆，同炭燒嗰種唔同，但咬落有好香濃嘅肉味，爽口嘅。上次屋企有食過外賣，覺得可以叫佢多啲醬，個醬酸酸辣辣幾好味👍而且個包食落唔會又乾又硬。雞扒撈檬份量都幾多，雞扒煎得外皮少少脆，但肉質好嫩滑，我覺得佢撈檬嘅酸辣汁調配得幾好，我唔覺得食到落底會特別酸，仲可以一邊食一邊加。呢間越南餐廳真心推薦💓👍價錢又唔貴，人均都係$50-60，希望可以keep住質素。