蘇杭餐廳 (已結業)

屋企附近多餐廳，但全部好早收同假日通常唔開～ 本人好鍾意港式茶記，呢區我成日幫襯特別有兩間龍邦同新開呢間近期新寵蘇杭，比較餐牌兩間係唔同路缐各有所長～蘇杭有一樣好服務係可以whatsapp落單，可以避免繁忙時間要狂打都無人接～ 同send每日午餐餐牌俾你～堂食同外賣都試過，因鋪位好細，繁忙時間比較難堂食，所以lunchtime通常whatsapp外賣～下午茶時間就有機會堂食，試過蝦仁蛋乾炒河，炒得好香；另外佢有其他茶記少有嘅韓式辛辣麵；試過韓式豬扒蛋烏冬，豬扒好味烏冬滑～Lunchtime外賣我特別鍾情於佢地嘅咖哩吉列豬扒飯，為保持吉列豬扒嘅脆，佢地好周到咖哩汁會分開上，咖哩唔算辣，個吉列豬扒好香口脆，好味！！ 第二喜愛係佢地嘅鮮茄豬扒燴意粉，唔係吉列都好味，特別一讚選多鮮茄汁用黎送意粉；另外試過個西冷牛扒飯都好味～總括，食物有水凖不馬夫～

又一間新血响'上環食街'出現，朋友話佢哋嘅咖哩唔錯，都好，唔駛煩lunch食乜，就試佢嘅咖哩豬扒意粉。外賣咖哩同意粉分開盒載，咖哩汁份量ok，但係就稀咗啲。開盒時香味冇衝擊，食味亦唔夠香，汁底只係有薯仔，唔入味嘅，亦冇走油，好健康=.=。咖哩有丁多洋蔥味，但係就一條洋蔥都見唔到，可能溶哂掛。不過件主角豬扒做得好好，豬扒上咗吉列皮，鬆脆冇筋，肉質稔得黎有實在嘅口感，蒜香味令豬扒惹味起黎。至於個意粉，正正常常茶餐廳overcook果種，冇咩可以講。同一條街有林林總總嘅食肆，有做咖哩嘅唔止佢一間，'兩腳'茶餐廳嘅咖哩好味過佢多多聲，人哋薯仔有走油，出菜前加洋蔥番兜，雖然件豬扒係冇佢咁好食，但係汁料夠，香料勁，唔會稀悠悠，而且份量大。仲有，人哋賣緊42蚊包中湯或熱飲(凍飲加2); 蘇杭呢，48蚊堂食包熱飲(凍飲加3)，外賣自取減3蚊都仲貴過人，點攪呀。我只可以講，佢一啲都唔難食，但係唔可以話好好食，可能我俾朋友誤導咗。我會再試，不過試另一啲嘢，希望唔好再令我失望啦。