華豐燒臘專家 (已搬遷) 新店位置

早幾個禮拜有客上嚟食lunch, 話要食燒味飯, 老闆食開呢度0既叉燒, 所以就嚟咗呢度買飯盒. 老闆同客都要叉燒油雞飯($20@), 我就要燒珍肝飯($18). 老闆一向鍾意食呢度0既叉燒, 我都覺得幾好味, 但燒珍肝唔係度度有, 所以都係食燒珍肝飯. 返到公司幫老闆同客過碟時, 見到d叉燒油雞都幾靚, 而且倒出嚟都幾大碟, 平日成個飯盒捧住食都唔覺. 我個燒珍肝飯幾好味, 燒珍肝好香, 又啱啱好唔會燶, 但都幾滯. 聽日個客又嚟食飯, 話要食叉燒燒肉飯, 話上次食油雞太麻煩, 老闆就要叉燒飯, 話都係最鍾意食叉燒, 我就諗住食叉燒燒珍肝飯, 無咁滯又食到燒珍肝嘛.

今日公司開市大吉，搞了個小型的開工儀式。不能缺少的除了是舞獅之外，還有那隻酬神金豬。同事在過年前已在這裡一早預定了一隻，因為公司人數不多所以只要了隻中豬，大概是30斤左右，價錢是一千六百幾。仲隨豬附送斬燒肉師傅一個，只需事先講明同備利是一封就掂。朝早燒起便托上來當然是新鮮熱辣，皮脆肉香好鬼正。至正當然係腩排，專登叫師傅斬大條D，個人覺得是什麼鬼佬烤排骨都要行埋一邊。除了燒豬，還有油雞及燒鵝，面對美味燒味的誘惑，什麼禽流感都已拋諸腦後，大家都照食可也。二千蚊唔使，成十個人食左一餐，仲派埋俾左右隔離都仲有幾盒剩，都米話唔抵。雖然大家應已開工幾天，都在此祝大家開工大吉！

呢度賣燒臘，但不設堂吃，燒臘同其他食物都要買走。吃過這裡的各種燒臘，味道不見特別，如吃叉燒及燒肉的話，寧願行上一條街去龍記或新記好過。但最出名的是茶腿及金華火腿，送禮自奉都適合。買生的金華火腿要原隻買，呢度會幫客人劈開一舊舊，因為自己無可能搞得掂。48蚊一斤，一隻金華火腿約六斤幾七斤，合共三百多。價錢唔算貴，同燒腩差不多，亦比以前平了不少。茶腿就廿零蚊一兩，可即切即吃。而家香港賣呢兩味野，除金菊園外，相信只止一家。