華園美食 (已結業)

這間餐廳就位於斜路的中間，間中都會見到有些食客在外邊等候，有些是等位，有些是等外賣，常常經過都害怕它的午市飯太多太飽，有次比較肚餓，終於可以一試。其實冇乜特別，不過這兒的椒鹽豬扒的豬扒，較薄，亦帶少許脂肪，比起上次北帝街天園餃子旁的餐廳的口感更好吃。這兒的不算是脆炸那種椒鹽豬扒，反而比較多蔥及洋蔥去調味，豬扒偏向薄身，肥瘦均勻，可能因為比較多脂肪，因此口感會比較滑溜。使用比較多洋蔥因此可以用它的汁去撈飯，比較濕潤，容易拌飯。這兒的茶味道也不太差，茶味濃香，不過檸檬雖然夠多片，但都檸味欠奉，以這種舊式茶餐廳來說，這杯凍檸茶也只是中庸之選。

呢間算係我食Lunch開飯首選，平！靚！正！在橫巷一間不起眼的小店，但午飯時段多數要等位。我最欣賞個太陽蛋，半熟蛋黃，啜完一啖仲有半熟蛋白，加埋少少脆邊，超正！豉油皇牛扒煎雙蛋飯 $43，煮過既豉油，薄切牛扒，加埋雙太陽蛋，大滿足！鮮茄牛肉湯飯 $44，超級足料！好大碗湯，好鮮甜。配料有蕃茄，蛋絲，草菇，牛肉，非常滿足！我見燴意粉都好多人叫。真係每次去都會選擇困難症發作。有時晏左放飯，下午茶時段我就會食公仔麵。豬扒煎蛋麵 $32鯪魚球煎蛋麵 $39普通單拼/雙拼麵都係$32，唯獨配鯪魚球就貴啲，我以為係酥炸鯪魚球，原來唔係。不過又真係幾好食，仲大大舊，正！而個公仔麵係爽麵，係我鍾意既口感。

今日難得可以食個早餐先返工， 所以特意來試一試呢間華園美食！ 係一間舊式茶餐廳，我地兩個坐低，好似都有點格格不入！ 哈哈我點左個餐蛋米粉、熱咖啡！ 米粉份量很多，而且有兩塊午餐肉，仲很香脆，蛋都係熱辣辣👍🏻👍🏻👍🏻 全部新鮮即煮 即煎👍🏻👍🏻👍🏻 唔係預先整好曬！ 十分欣賞！ 埋單$29蚊，價錢都很抵食！

這間位於土瓜灣的食肆，是我經常幫襯的，早餐、午餐時間，經常爆滿。今天下午茶☕️時間，沒有太多人，便來到了。這裡下午茶除了三文治、麵食、沙律、薯條等，價錢由＄25-35，涷飲加$2。我要了炸雞肶🍗沙律$31，雞肶外脆內軟，沙律🥗是紅蘿蔔、薯仔、青瓜，份量豐富。

一早又要出嚟土瓜灣練波，又打風又大雨真心燥底， 真係要食個豐富早餐嚟慰藉下心靈。個個早餐都一式一樣 ，但係聽到台台客都叫豬扒通/米…… 一定有古怪，等阿姐都試下先。塊豬扒係即煎嘅， 熱辣辣， 我認真醒目叫阿姐幫我 碎上， 唔使擘到個嘴咁大。 茶記早餐賣相一樣，但呢塊豬扒真係正， 肉質鬆化，味我就覺得係加咗美極醃， 所以偏鹹同鲜味。我叫咗豬扒蛋出前一丁 ，都有搭兩條生菜， 都叫有誠意。餐廳地方唔大 ，兩邊有卡位，中間就圓檯， 路過呢區都可以去試下呢間嘅豬扒

由於這間茶餐廳，非常之近屋企，所以經常來到吃早、中、下午茶，這裡大約有六張卡位，三張圓枱，由於地方淺窄，座位都幾迫。由其是早上九點前，中午十二點至一點，我試過迫到想死，不過反而証明食物質素都算可以，唔係點會咁多人食🤔🤔🤔🤔🤔自從上次果碟太醎的雪菜肉絲炆米之後，個亞姐見到之後我又叫雪菜肉絲炆米，都會問是否少醎，呢個非常窩心👍👍👍👍今日下午工作回家，在這𥚃吃午餐，干炒三絲意粉$39，凍央＋2，共$41。干炒三絲意粉用紅腸、火腿、叉燒炒，鑊氣夠，味道適中。凍央太多奶，後來加啡好D。例湯無味精。其實上次偶然失手，這裡不失為本人飯堂。

這間位於上鄕道，開業差不多年幾，因為近屋企，所以經常幫襯。早上營業時間是七點，不過六點四十五分，已經有客在等。中午差不多十二點，已經爆滿，一點鐘更加無法進入。因為這裡的鑊氣很夠，所以附近上班的人都會來這裡吃飯。今天我揀了中午十二時半，來到時剛好有位，點了雪菜肉絲炆米，約幾分鐘就上枱，第一口有發覺有點鹹和辣，吃了幾口發覺太鹹太辣，根本吃不到，於是叫侍應幫我換過。再來的比之前淡好多，可以入口，不過我都係第一次吃雪菜肉絲炆米係辣的，可能廚師加了些豆瓣醬炒，我下次不會再叫。😰😰😰