花想茶 (已結業)

將軍澳海旁一帶滿滿的餐廳，起初周圍一片寧靜未開發嘅時候我成日喺度講會唔會有茶飲店呢，附近又咁多學校住宅一定好好賺😍點知真係開咗間！本身佢叫做花想茶，不過最近店主有啲事所以同另一間同路店-茶匠合作主理，新增咗一系列嘅茶匠飲品系列之外仲有千層蛋糕賣😇👓匠人果茶 $30係店舖其中一個招牌飲品，唔算係水果茶嗰種果茶因為佢主要係橙檸檬百香果，偏酸甜嘅生果，叫咗少甜的確好好多唔會太甜漏，但佢嘅水果味其實唔算非常重，偏多橙汁而茶底唔算好香，如果以果茶對比下附近嗰間無所事事茶飲店嘅味道比較精緻🤣評分：6.5/10👓百香果茶 $26選擇左紅茶底，30%甜度🤣雖然幾乎走甜，不過又接受到喎，可能因為佢落咗好多百香果所以有足夠果甜，又唔算非常酸，但係個茶底比較普通，唔算好重茶味好靚茶葉，如果以茶底來講都係天仁好啲🤣但如果夏天係街出晒汗好頸渴以呢個價錢我都會照買番杯橫掂揀微糖唔太邪惡🤣評分：7/10

今日同事話happy Friday ，一齊買珍珠奶茶，諗住試吓附近個間花想茶，見到佢近排開，都有人買，所以大家都好興奮咁叫外賣。我就點咗一杯芋香奶茶，少甜少冰。都有d期待，但係見到實物個陣，OMG，係一杯紫色嘅嘢，一飲落去，水一般的味道，又稀，想點呀，冇茶味，冇芋頭味，個顏色好明顯係用粉沖出嚟嘅，好心就比多少少heart啦。我飲咁多年珍珠奶茶，真係未試過衰到咁！講真呢啲嘢好難唔好飲，咁都攪成咁真係恭喜晒！

千層蛋糕真的好難食，買咗兩種味：芝麻和朱古力味，仲話手造80層，真係唔敢想信，死死實實咁👎，cream又唔夠鬆軟，D皮加埋cream食落去有Q彈嘅感覺，完全唔似食緊千層蛋糕咁，兩種口味食落去都好假咁，令人非常失望！

見天氣酷熱。就買杯嘢飲下啦！見呢間舖頭冇乜人就諗住試試啦！買左杯白桃烏龍茶解下暑，份量就真係大份都可以算係抵飲！至於個茶底方面。就係唔夠突出！唔係好覺係烏龍茶。但係都接受嘅！同佢講話加有啲蜜糖，都有返啲甜味！可以接受嘅！至於冰嘅比例方面，亦都係有按比例咁增加減少！可以話係合格！整體來講杯嘢飲係過得去嘅！但未至於話係好飲，仲有好多進步嘅空間！希望可以繼續努力！以服務方面，都算有效率嘅，亦都係整潔。環境都係闊落嘅。👍👍

就算係獨市生意賣飲品，都唔係做到咁求其掛，大佬呀？？？？朱古力奶茶成杯野飲根本就係冰水溝朱古力奶！（仲要係淡到水咁既味）⋯ 收銀態度奇差，落單無禮貌⋯ 榛子朱古力佢話冇榛子，咁我話就咁朱古力，佢又話：無呢個選擇喎個牌係明明寫左有朱古力？⋯ 好，咁都算。咁我話朱古力奶茶佢又有既⋯ （佢個時淨係答我冇呢個選擇嘅時候係冇推介過我任何，等你企喺度自己慢慢睇）好啦，野飲整好左又唔拎出黎，拎出黎叫錯號碼又唔理，擺係台面就算，由得一堆客人自己任簡任摸（疫情呀大佬）收銀懶懶行坐係到，除左收錢快無優點嚕⋯絕對唔會有下次😅😅😅😅😅

好耐無寫過食評，但今次真係忍唔住要反應返，仲要係第一次寫嘢飲。一直都想試下尼間嘅嘢飲，諗住試下最基本嘅黑糖珍珠鮮奶，心諗應該唔會太差，製作時間都好快。點知飲第一啖，以為自己無攪均，所以先咁甜。但再次攪咗好耐，再飲，發現係啲珍珠太甜，唔係普通太甜，簡直係甜到漏🤦🏻‍♀️🤦🏻‍♀️🤦🏻‍♀️忍唔住要即刻倒杯水來飲。如果真係飯完尼杯，相信糖攝取量一定超標幾倍🤦🏻‍♀️🤦🏻‍♀️🤦🏻‍♀️飲咗幾啖已經飲唔落去。唔知其他嘢飲係唔係都咁樣😔

係澳南食完飯，就搵啲野飲下啦，行到呢間花想茶，見佢新開，又走簡約路線，就入去試下佢啦！蘋果烏龍醋茶 $26食飽飯似番杯酸酸地既醋茶，幫助消化又健康！今次呢個烏龍茶底既醋茶，烏龍味就唔太特出，但果醋味真係好出！仲有淡淡既蘋果香味，都ok嫁！ 不過記得要3分糖就好，唔係就會好甜！芝士奶蓋烏龍茶 $27芝士奶蓋就唔太夠芝士咸香，不過奶就幾香又綿密，配埋個烏龍茶味都幾好飲，唔會太濟。不過烏龍茶底就稍微淡左少少，如果再濃番啲就正啦！

踩單車🚴‍♀️經過呢一度 見到呢一間新開嘅飲品店 感覺時尚簡約Order左個 冬瓜嫩仙草 only $23好快就有 唔使5分鐘都幾好飲 仙草好jelly好滑冬瓜茶都好味 濃淡適宜下次會再嚟飲～

經過好幾次，今日終於幫襯下啦。飲完。。。Sorry, 冇回頭。成個經驗都好差，首先收銀台前地下好多垃圾，冇為意，冇清潔。跌咗落地俾客放垃圾嘅杯子，就咁執起放返係收銀台就算其實可以好好癡好係枱面，避免容易跌落地，整到啲地方污糟；跟住，前後加埋我得3張單(057-059)，竟然可以漏咗我張單，出完057就跳咗去出059，唯一讚嘅就係得知漏單，都好快處理我嘅order；我order咗黑糖珍珠紅茶奶鐡，恐怖事情發生喇，啲珍珠嘅質感就好似煲咗好耐煲到爛咁奶茶都唔洗多講，一個字差！我飲咗兩啖掉了！好抱歉，都唔想浪費希望可以好好檢討