其實裡面裝修唔錯，摩登新潮，新簇光猛，整潔企理。大部份都喺卡位，但啲卡位有少少窄，大隻啲嘅客人可能感覺無咁舒服。
埋單時晌收銀處見有外賣單張攞，所以，掃瞄貼埋出嚟俾大家參考。唔介多介紹，茶餐廳勝在乜都有，早餐、午餐、茶餐、特餐、常餐、麵餐、碟頭飯、小炒……等等，一應俱全。
而午市套餐就另外一個餐牌，日日都有6款供選擇，定價都喺五十零蚊，太子區，差唔多啦。小弟就揀咗個常餐，轉通粉，慣例飲熱奶茶。
常餐H $48
火腿奄列及牛油厚多士又點？份量就好足架嘢，蛋內有唔少火腿，而多士明顯做得都喺求其，烘一烘，撻少少牛油落去，另外，膽敢講句，肯定唔喺「厚」多士囉。
杯熱奶茶總算攞番少少分，其實唔算好高質，但對比起通粉、奄列，奶茶叫做喺茶記出品嘅應有水平，色澤沉實，茶底夠香，茶奶比例亦OK，喺口感未沖到絲咁滑。不過，沖到成個杯邊都喺茶漬，就令觀感大打折扣啫！
可能喺我咁唔好彩，揀咗個中伏常餐，朋友話佢哋嘅午餐唔錯喎。招呼方面，都喺一般般，無話好好，亦唔覺差，不過，應該就唔會再幫襯。其實，家下做飲食確喺唔容易，所以，小弟都甚少俾負評，「花墟茶餐廳」你算喺實至名歸！
影片
