能記飯店

營業中

休息中

香港美食種類繁多，廣東式燒味林林總總不能或缺，而在一個小區中，以一類燒味，達至世界馳名，其實是一種榮耀。《 能記燒鵝飯店 》屹立在荃灣區的深井一段長時間， 選用鵝的品種和大小重量有着獨特的見解，也迎合着不同顧客的要求。燒鵝 :《能記》選用了胸肉較厚的鵝，部分位置需要點嚼勁，所以肉味也突出來了。鵝是大體形的一種，在鵝髀皮下會留有脂肪，有着精心燒烤的香氣。皮下脂肪使得鵝肉與鵝皮在烤爐内產生微妙變化，也表現了廚師之手藝及經驗。造成鵝皮會透光和近似油炸的香脆口感。豉油皇鵝腸 : 腸管是用來輸送與消化食物的，大腸與小腸相當好辨認，也齊集在碟上，其中特別的是粉腸，它是在小腸的最前端與胃連結，相當於人身體中的「十二指腸」。一片帶點淺粉紅色、 略似肝臟和口感軟滑，就是鵝的粉腸部位了。溫馨提示 : 《 能記燒鵝飯店 》設有外賣，而燒鵝是不定時新鮮出爐的，敬請留意 !

深井 絕對係美食沙漠 因為選擇少 得果幾間獨巿茶餐廳 泰菜店 住係呢度附近的居民 冇乜好揀如果你專登黎深井 黎到能記食飯 一定會想講粗口 除非你冇要求 店家咁樣製作食物 就係對自己冇要求菜式“香煎蓮藕餅“ 可以改叫做 粉餅如果冇心做，就不如取消呢個菜式好嗎？1. 咬落去 全口油冧冧 睇落去 8成透明 成口只食到係粉 蓮藕好貴咩？2. 要煎到咁樣衰嗎？酒家菜式，可以咁既賣相？如果我不是外賣，我一定會叫你食返啖。我另外order兩款菜式： 彩椒牛柳粒 － 算正常的，但牛柳似係拾熟咁，毫無鑊氣/香煎的感覺 脆皮豆腐 － 冇調味的豆腐 跟一兜很咸的水 會好食嗎？當天我5點半左右來貴店，堂食6點即將停，只得我一份外賣等我取，可見生意不忙，出品卻是這等質素。

由荃灣出發行半段的元荃古道。行了三個多小時，終於到達深井，即時去能記食燒鵝，獎勵自己。以前到深井，只識得去裕記，初時都覺得好食，但它的燒鵝及其他菜式的水準，每況愈下。轉去陳記食，質素也慢慢地下降。直至朋友介紹去能記。食燒鵝，最重要是皮脆肉嫩，有肉汁而不會乾，上枱時仍熱，能記的燒鵝就符合我的要求，令我滿意。一人獨食，叫了碟例牌，一碟花雕蜆，蒜子上湯勝瓜。蜆鮮甜仍有些砂，勝瓜則無任何問題。至於燒鵝，皮脆肉嫩，不枉我再幫襯。配上啤酒，倦意全消。

今日同班朋友行完山，去到深井試下傳統嘅炭燒鵝，我地到了一間門口比較懷舊的能記飯店，老闆說鋪面上的石雕招牌已有幾十年的歷史，我地叫左半隻燒鵝，一上枱已經被佢嘅香味吸引，食落去皮脆，肉質好有口感，但略嫌皮下脂肪太多，不過可能撞啱依隻係肥鵝。我地叫左蠔餅，蠔餅是比較雞蛋多粉少那種，個人比較喜歡這種，不會太油膩。另外仲叫左得獎菜式蒜蓉開邊蒸蝦，但就比較失望，蝦肉明顯唔夠新鮮。椒鹽鮮魷也是油太多，但唔脆同冇乜味。如果說是比較出色的是香煎蓮藕餅及蒜蓉焗茄子，蓮藕餅的口感非常爽脆，配上免治豬肉比起一般用魚肉更加有口感。蒜蓉焗茄子用上已去皮的茄子，入口清新，與濕蒜和乾蒜配合得天衣無蓬。

講起深井，相信好多人第一時間都會諗到食燒鵝⋯我都唔例外，全因小時候屋企人耐唔耐都會入去搵食（自細開始培養食好西🤣）。出發前特意問左家父食開邊間，其實已經冇咗印象好唔好食，隨便一間都冇所謂，只係回憶總是美好，人就係有種情意結想搵番啲舊野。對比喺大街嘅陳記，需要轉個彎先到嘅能記明顯顧客比較少，唔知係位置定實力問題🧐-🐦燒鵝例牌 $168無乜肉，皮唔脆，多肥膏，完全係失望。招牌菜嚟講會總結唔掂😀-🐮蝦醬通菜炒牛肉 $98中菜入面我最愛通菜牛，但絕對唔係間間好食，而呢間我比💯。牛肉大塊份量多，肉嫩；通菜翠綠多葉，掛汁程度高好好味❣️好難得有一間做到牛肉通菜都同樣出色😋-🐟鯪魚蓉釀山水豆腐 $88豆腐係滑嘅，整體就不過不失無驚喜，呢個價錢得4舊太少。另外上菜嘅時候發生咗個小插曲：話說呀姐擺低時得4舊白滑豆腐無左鯪魚蓉，當我地問佢嘅時候佢好堅持我地落單淨係講左山水豆腐所以就整左呢個無鯪魚蓉版本，問我地要唔要轉番但其實極不情願，因為我地表示要轉嘅時候佢話都係只可以係上面加番鯪魚肉🤷🏻‍♀️-總結：整體質素平平，通菜牛加分，服務態度減分，如無意外唔會想再幫襯。

第一次去深井探朋友，佢都算係深井原居民，梗係請教佢邊間嘅燒鵝最好食啦。朋友話其實間間差唔多，佢問我地想食肥D定瘦D，我就話瘦D啦，無咁罪惡，於是佢就帶我地去咗呢一間。呢隻燒鵝係用炭燒嘅，所以佢D皮帶有炭香味，特別係脾位支棍仔，炭香味濃D再加上燒到燶燶地，真心正。佢隻鵝又真係幾瘦，皮同肉之間無乜皮下脂肪，唔洗一邊食一邊要咬走D肥膏，尤其是佢個頸位，真係食得特別暢快。不過因為佢真係瘦，所以食到一D肉地比較厚嘅部份，相對會比較韌，不過無辦法啦，要瘦就一定唔肥美。除咗燒鵝，友人仲建議我地要試佢嘅椒鹽魚扣。魚扣，即係魚嘅胃，一般最常見係烏魚扣(烏頭的胃)，有D火鍋店都有得食架，食落煙煙韌韌有趙口，因為一條魚只有一個扣，所以真係要熟客先至攞到。呢個椒鹽魚扣好食嘅，不過又未算好有驚喜，但係由於出面其他地方真係好少食得到，所以都係值得一試嘅。

星期六，難得家人放假，突然想起，大家一齊去深井逛逛 看看，有多年沒來這邊了黃昏時分，肚餓啦，不如提早食飯，繞了一圈，路過能夠燒鵝飯店，嘩！看到招牌 始創於1962年，半個世紀😀頗長時間喎，即管試試，那麼早，已經有客人在吃深井 必吃馳名燒鵝，例牌 $160，足夠二人皮少少脆，肉質一般，惹味 .. 汁，點酸梅醬😋豉椒鵝腸（要求走辣）鵝腸😊爽脆口感，豆豉、青椒🫑、黃椒，色彩鮮艷炒得不錯👌淡淡 不油膩再加多碟 通菜鮮魷嫩綠通菜，鮮魷魚豐富晚餐🥣吃得飽飽，得閒再嚟， bye

一行6人來到能記，有限聚令情況下可能沒有鵝吃，一早訂枱時已留了一隻...來到先叫了小炒王，但小炒王居然不是炒廿韮菜，而係炒四季豆，已經莫名奇妙，亦無常見小炒王的炸魚乾和魷魚...只有豆干、蝦干和四季豆....味道也一般人齊就來鵝了....不輸裕記的鵝....但鵝的size 不大隻...6個麻甩佬吃就不夠了...其餘點了什菜煲、蓮藕餅、鵝肝、蒜蓉蝦、椒鹽白飯魚....除了蓮藕餅比較好，其他也是一般....人均消費310元..不夠抵了.....

之前父親節試過一次，意想不到好食過其他兩間。今次訂咗隻燒鵝外賣回家晚飯，皮又脆肉好新鮮。個老板好有禮貌，服務態度又好好。希望遲啲下次可以去鋪頭一家人食飯再幫襯。

冇乜特別驚喜，入來深井食燒鵝都成咗20幾年，就係冇入過呢間，由荃灣行到深井醫肚，就試吓新嘢，燒鵝係冇想像中咁好食，仲好有羶味，皮又唔脆皮，大失所望，其他食物就不過不失

當日去左同事深井屋企玩狗仔,玩完狗仔之後主人家就帶左我地去能記飯店開餐。 黎到深井當然要試下呢到最出名既炭燒燒鵝啦(我等左呢個機會好耐啦),咁當日我地仲叫左籠仔翡翠豆腐, 花雕酒煮蜆,椒鹽九肚魚,糯米飯等等。 咁我最期待既當然係燒鵝啦,一上枱見到即時緊係影張相,但影完張相已經急不及待要試下啦,一食落去就咬到佢既皮好脆,肉多汁,仲真係有炭火燒過既味道,真係我係第二度食唔到既味道黎,十分精彩。 花雕酒煮蜆就煮到岩岩好熟,但上枱時就凍左少少,但都食得出花雕味好濃郁同埋好有酒香味, 蜆就都無沙且鮮味,不錯。 椒鹽九肚魚應都炸得剛剛好,唔會炸到好柴,真正做到外脆內軟,好食。 籠仔翡翠豆腐個份量十足,我地五個人去食,好似食極都食唔曬咁,但本人唔太鐘意食青豆,,所以減左少少分。 而糯米飯既質感煙韌,既香且風味十足,我地幾位都對呢個飯讚不絕口。 總結黎講呢一餐晚飯我地都相當滿意,而且價錢都唔係我地心目中咁貴,如果一大班朋友想食正燒鵝既話,真係要黎深井試一次呢!

同長期居住外地嘅朋友晚飯，特登揀啲只有香港先可以食到嘅美食。燒鵝雖然外地都可以食到，但一定不及深井的原汁原味。今晚嘅四人套餐有燉螺頭湯，燒鵝半隻，豉油王鵝腸，籠仔翡翠豆腐，同埋椒絲腐乳炒通菜。燉螺頭湯非常足料。雖然套餐係四人份量但四個人每人分到兩碗有多。燒鵝色澤不錯，但係皮可以更脆。鵝本身唔係太肥，可能係因為季節關係，但其實係一件好事，唔使每次都撕走皮同肉之間的肥膏。豉油王鵝腸浸得入味，可惜同而家絕大部份餐廳一樣，鵝腸內嘅肥膏早已去掉，失去了肥膏的甘香味。不過同行的朋友依然非常欣賞。籠仔翡翠豆腐份量好多，清清淡淡中和了燒鵝的肥膩。通菜炒得有鑊氣。

深井燒鵝老店在幾間燒鵝鋪頭中，最少賣廣告的一間，但不代表質素比下去。從小都去食，今次有親戚準備離港，特意開車入深井大吃一頓。老闆甚有人情味，二十幾年來，保留舊香港風味。幾位師傅都是老師傅，廚藝一流。燒鵝加白飯拌燒鵝味一流椒鹽大蝦內脆外軟真是必食加上足料老火燉湯再叫了一個涼瓜魚頭腩，非常滿足不過留意開門時間，星期一全日休息，星期二至四只做晚市，星期五至日和公眾假期全日營業

3個字 好 垃圾 rubbish.中既首選首本名菜 燒鵝 又凍又肥 你話佢凍 佢話幫你叮番熱佢。哈哈哈 好一個叮字 叮鵝收548 加一 600有找 抵!專業!高級! 難怪係名菜!去到食小菜 ...蒸個瓜 諗住蒸野無死... 蒸過龍 ！ pro! 軟到爛。 方便咬唔到野既人食 真夠體貼!!!豉椒鵝腸 睇見都知係豉椒整既。。因為。。 係黑色既! 簡直名符其實 有過之而無不及la.....去到最普普通通既白飯 你比碗生既飯黎既。。。 真係打多幾句都哂時間。 唔信咁垃圾既 歡迎試食 強烈推介

本來諗住食裕記，但人多到要排隊等位，實在大誇張，因為趕時間嘅關係，但係又一場嚟到深井，點都要食到燒鵝至肯走嘅我地，就走咗去裕記隔離嘅能記燒鵝，一入去，只有兩枱食客(未計我地)，聽到佢地都係老闆啲朋友，熟客。我地感覺有啲賴野，但冇辦法唯有就膽粗粗，叫碟燒鵝例牌試吓~食落又幾好味，皮脆肉香，侍應主動建議我地加碗瀨粉，鬼真燒鵝瀨冇得頂。之後叫咗碟 花雕煮蜆，啲酒味好濃，最難得蜆肉多，又冇沙。都唔明點解呢間味道唔錯，但生意咁淡泊，可能地理位置問題吧！