而打淥滷汁拌粉 (青衣城2) (已結業)

今日終於食到而打淥滷汁拌粉,之前佢新開張，日日都排晒長龍，每次經過，都會傳來陣陣滷水香，裝修好有特色，好似真係去左台灣夜市咁。今日早左收工，未到食飯時間，見佢未係太多人，即刻走去買返屋企食，原來佢有涼拌同熱滷選擇，夏天揀涼拌一流，冬天揀熱滷就暖笠笠，我揀左輕盈肆拼同淺嚐三拼, 入面有蓮藕片，椰菜花，蘿蔔，鵪鶉蛋，雞中翼同滷豆干。攞到返屋企仲係熱辣辣香噴噴，佢個滷汁係俾出面既唔同，特別香既，應該落左唔同既香料，份量方面都唔少，蘿蔔同蓮藕夠鬆化入味，媽咪鍾意食滷豆干，因為平好少食，我自己勁鍾意食鵪鶉蛋，非常好味，可惜得四粒，如果多啲就好啦！輕盈肆拼爽口蓮藕片/台灣花椰菜/化口蘿蔔/鵪鶉蛋淺嚐三拼爽口蓮藕片/雞中翼/滷豆干

一入青衣城二期遠遠已經👃🏻聞到好香滷水味，四圍望由邊到傳來，見到這間滷水檔有人等外賣，又買了兩盒加餸。輕盈肆拼 | $48。鵪鶉蛋4粒。化口蘿蔔1份: 蘿蔔幾入味，軟硬適中。花椰菜1份: 煮得好腍，較為零碎，但最有滷水味。爽口蓮藕片1份: 爽口，約有4-5片，第一次食滷水蓮藕片一桶天下 | $58。奪命鳳爪2隻: 鳳爪大隻，可以再腍點。古早厚切腩肉2件: 肉質夠厚，肥肉均勻，有肉食下會滿足點。化口蘿蔔1份。台灣貢丸2顆滷水可以加熱，令我想起台灣的滷水檔。有機會下次再試下散叫其他食物。

呢一間滷水平時都好多人排隊，但我唔太鐘意排隊唯有叫屋企人黎排 終於可以食到喇 叫左一個招牌五拼加鵪鶉蛋 🤗有滷水豆乾、雞胗片、金錢肚、頁丸、化口蘿蔔。 款款食材都好入味啊 而且味道亦都唔會太鹹 仲唔會好口渴添 我自己個人就極鐘意金錢肚同雞胗片 超級超級爽！有啲驚喜既係 估唔到仲食得出依啲食材既鮮味 唔會有冰鮮味 😎我地仲將啲汁加落啲麵度 好好食！又吸汁！鵪鶉蛋 好彈牙 味道又好入味 滲透哂入去 而且一口一啖 岩岩好！ 一家大細都岩食

避免堂食嘅日子繼續發掘可以外帶返屋企嘅美食，經過青衣城被好香嘅滷水味吸引咗去呢間台式滷水店，店面吸引乾淨企理，就決定買嚟試下：🍲揀咗一個熱滷水拼盤： 一統天下（$58-二人用），分別有蘿蔔、貢丸、鳳爪同腩肉，另加$14可以要埋乾拌麵，份量算足料，每款有2-4件，味道調校得相當好，食到有層次嘅滷水香味又唔會過鹹，蘿蔔同鳳爪都炆得好淋好入味，腩肉肥瘦適中，另配嘅粗麵條彈牙有咬口可以索盡滷水汁，好味！🥣另再加咗個一人份嘅涼拌小食 - 廟口獨享（ $38 ）。呢個涼拌組合有雞中翼、蓮藕同貢丸，涼拌同滷水係兩種完全唔同嘅味道，涼拌帶好香嘅古早味，同爽口嘅蓮藕非常夾，雞翼似鹽水雞嘅味道，好惹味！💁🏻‍♀️呢間台式滷水店做得好出色，呢類型嘅食物帶返屋企隔一陣食都可以保持水準，絕對係外帶嘅好選擇！

前幾日睇電視介紹台灣，真係好掛住夜巿嘅美食呀！以解相思之苦，我去咗青衣城嘅而打淥滷汁拌粉買麻辣撈和滷汁雞翼返屋企慢慢嘆～ 涼拌麻辣撈肆拼 ($68/2人份)包括 -麻辣雞翼尖-麻辣牛肚絲-玉米筍-爽口蓮藕片-追加冷麵 ($10) 四拼一盒都好大盒，當中我覺得雞翼尖最好味，滷水汁醃得好入味，同埋炆到Ｄ雞翼尖好淋好易”LUN”骨。另外牛肚絲都好香麻辣孜然香味，玉米筍和蓮藕片吃下很爽口。落Order後店員即場撈，所以要等一陣，我同店員講要少辣，覺得麻辣味啱啱好，食落只係少少辣唔會辣到流鼻水，冷麵就乾身咗少少，但10蚊好大碗好抵食，整體都好惹味。 雞中翅 ($16/2隻)雞中翼充滿滷水汁，醃得入味，比想像中大隻，伴有滷水花生，滷水夠甜也不錯。

成日放工都勁過呢間咁搶眼嘅舖頭見到咁多人排隊就去睇吓到底係咩嚟嘅，點知原來係台灣滷味，我真係好掛住台灣呀🥲佢舖頭做到好台灣風味，好似去咗夜市嘅舖頭。你可以分開叫再一齊撈，又可以叫佢啲套餐，懶懶嘅我叫咗套餐。叫咗個熱滷，同埋涼拌。熱滷買咗個兩人用既輕盈肆拼，有蓮藕片，花椰菜，蘿蔔同埋鵪鶉蛋。呢幾款本身我都好鍾意食，簡直為我而設，令我最深刻係好林好入味嘅蘿蔔，明明好多人買點解啲人話唔好食？我又唔覺得唔好食喎,仲有花生涼拌叫左廟口獨享一人用，我覺得佢份量都算幾多，重點係唔貴又幾好味。入面有雞中翼，蓮藕片同埋貢丸。有兩隻雞翼同埋兩粒貢丸，蓮藕片超多，我覺得幾抵食，我仲要加咗個冷麵，估唔到佢冷麵嘅份量幾多，好啱我口味，仲有青瓜同埋芫荽喺裏面。

冇晒堂食咁就搵下有咩外賣可以買番屋企試下，青衣好似大部分都係連鎖店，難得有間特別嘅小店所以就試下買番去加餸。個舖名夠晒特別，食鞋音「二打六」🤣滷味黎講都好多款，主打台式滷味風味，今次我就買左個招牌五拼試下。🔅招牌五拼 $88入面有金錢肚、雞胗、貢丸、蘿蔔、豆干，金錢肚同雞胗嘅份量佔左大半盒，份量算多，唔會好似出面牛雜咁疊左一堆蘿蔔係底，算係有良心。牛雜都滷得夠淋同埋好入味，鍾意佢個滷水汁夠濃，重香料🔅豆腐串$12見到有豆腐串諗都冇諗就加左，浸落去吸晒啲汁超正👍🏻👍🏻

裝修好台式，係台灣既古早夜市風格，可以棟係度食/買走。價錢少貴啦，不過話晒青衣都無乜選擇，試一次啦。揀左粟米仔同豬耳，味道唔錯喎！夠香，夠味，係無得揀辣，佢都無提供呢個選項俾我。豬耳都唔會太硬，有時台灣啲滷味硬到會un胃，但佢無。係有一種好獨特既調味，形容唔到，但睇個色水你應該會get到我講咩（掛？😅總之好食到清晒！

成日行過青衣城，都會聞到一陣好香既滷水味，唔係講笑，係真係好香。今次終於忍唔住想試下，因為真係太掛住台灣了，試下佢比唔比得上台灣d滷味。試左佢一個熱撈加一個雞腎，吃落口，不得了，中伏。麵係似油麵，但淡淡鹼水味，我就唔係太鍾意啦。撈麵個汁太淡，又浠🥲成個麵係好淡。唯一好少少既係雞腎，普通味道啦。開業既時候真係打曬蛇餅咁，到依家已經小貓一兩隻，除左因為疫情下既原因，我唸味道都係一大原因啦。大家衡量下要唔要去試下啦

鹽水雞原來就係涼拌………..我完全冇諗過想食涼拌囉，離遠行過，聞到好香滷水味原本想食滷味，結果買咗涼拌😒😒啲餐牌寫到唔清唔楚，難怪會問我麻辣都唔知乜鬼嘢味得個香字味道麻麻真係無下次

今晚有要事沒有回家吃晚飯，知道青衣城二期開咗間「而打淥」，當然去會一吓，睇咗套餐個餐牌一輪，唔知選擇食什麼好，收銀女服務員💁🏻拎出另一張餐牌耐心介紹説可散叫，卒之買咗一份麻醬雞肉撈冷麵$30及一份蓮藕片$12，味道當然同之前幾篇食評一樣，完全冇味道可言，利申本人一向喜歡淡口味的食物，我覺得同佢舖名一樣只是白烚淥一淥，個撈麵話有麻醬，唔知佢意思麻醬是否落數滴麻油，少少芫茜，兩小粒青瓜粒，就算是麻醬，而雞肉是切雞，份量5只手指數得晒，個麵份量以我細食黎講也可以，好彩我加購一份蓮藕片，否則唔知可否能夠繼續食晒佢，如果老闆仍不改善烹調味道，相信不久會結業收場。

價錢貴 份量少 味道麻麻 。啱啱開嗰時勁多人排隊。古語有云 新屎坑三日香。呢間野標榜係台灣滷水 但係食咗之後就覺得完全同台灣滷水四個字不可相連。價錢都唔平份量少。老實講買內臟買到咁嘅價錢真係有啲唔值。不過明白嘅係商場開一定貴租。

每晚收工經過，都聞到一陣滷水香味，心諗有機會一定要買黎試下！結果今日一試，完全係有幻想幻滅嘅感覺...首先店面上屏幕顯示，各項配菜大都有半份或一份選擇，但到點餐時，職員只係冷冷地回一句：「而家無半份架啦！」沒有更新價錢資訊誤導消費者，還配以這種態度，印象分已大減了！回到家，急不及待馬上打開品嚐，卻很奇怪怎樣也聞不到那種香噴噴的滷水味！先吃一口金錢肚，有點硬不夠淋，然後發現拌麵味道也偏鹹，吃完全碗後，全晚都感到很口乾，可能味精太多了！總結來說，只怪自己今次被嗅覺騙了而失去理智，沒有先上OpenRice 看看他人食評。。。

成日行過聞到好香，忍唔住買少少試下！點知中伏😢鴨血$30得5舊，另外個碗杏鮑菇同雞腎唔記得幾錢，但份量都係得好少🤷🏻‍♀️奇怪既係點做到行過聞到好香，而食落竟然無味既？只可以講，我都唔知好唔好食，唔係難食既，都食得落口，反正就係無味，份量又少，食完都感覺唔到自己食過乜嘢！總之就係無回頭就算！總之同我平時係台灣食既就完全唔同味道！服務方面，作為一間新新地既小店而又無乜人幫襯的話，服務態度可以親民啲好啲！

行過俾香味吸引，買過兩次。(1) 雞腳，完全唔入味，亦唔夠林。(2)豬手加蘿蔔，豬手無剪開，難進食，蘿蔔唔夠林。叫咗多汁都只俾咗少量汁。對居民來講，本來呢間店嘅定位，買來加餸係一個好選擇，但質素實在太差。總括，唔會再幫襯了。