影片
呢篇係小弟(Mappy)嘅第一篇食評，如果有不足之處，請大家多多指教！第一篇食評就寫咗［知味廚房］，點解呢？其實係因為佢哋價格相宜得嚟，食物質素亦都唔差，再加上食過幾次都keep到水準，所以想推介俾大家。餐廳唔算難搵，3樓一出升降機直行轉右就見到。門外嘅餐牌寫咗今日有咩好食。記得第一次嚟嘅時候趕時間，ABC求其揀(驚D要焗好耐)，但個次見好幾枱揀D，都唔算等得耐。而之後自己再嚟食過一次，就決定以後淨係睇D就得啦！唔係話ABC唔好食，之不過同樣價錢食焗野，好似化算啲。另外，有湯麵餐揀，朋友食過話OK，不過不失。今日嘅D餐係焗洋蔥汁雞扒，平時有白汁，咖哩汁(我覺得最好食)，黑椒汁，茄汁，睇吓你撞啱個日係咩汁啦！順帶一提，飯可以轉意粉。而我就鐘意意粉多啲，因為呢度啲飯比較乾身。意粉食落唔會乾，洋蔥汁都夠。唯獨係呢度嘅雞扒較乾，食落較韌，所以要扣啲分。飲品要咗凍奶茶，都係普普通通，無咩特別。(宜家好少見到呢隻杯)總括而言，食物唔差，環境同衛生都可以接受，加上午餐$30+$2嘅價錢，勝在比葵興工廠區其他食堂嘅性價比高，值得一試。
繼續閱讀