發記麵家 (已結業)

3.5

12 食評

味道

環境

服務

衛生

抵食

103

土瓜灣

$50以下

港式車仔麵

奧志雷

等級4

2.1K

新黎阿嬸想點我坐孤獨單丁臉壁位，我梗係拒絕啦！問我好唔好，我答唔好！阿嬸一臉愕然，唔想當然要講唔好啦。平靚正快狠準，街坊價只售廿幾三十蚊救黎民百姓於水深火熱之中 ﹗我都知近來生意非常差，姐姐突然落力推消食物。

前面條口罩友選擇困難症左諗右諗，搞到四眼姐勁無奈等完再等又再等。老闆本來淥緊麵都睇唔過眼，暫停煮麵衝過來幫我夾餸出貨先。我比埋錢走人，條口罩友仲係度諗緊，後面十幾位排隊中既食客即時發放怨氣，看得見的負能量呀﹗

豬腸牛肚雞中翼鴛鴦少湯多辣走蔥加腩汁，抵食快靚正 $32 蚊體驗餐。豬腸大量可以成堆成堆塞入口，勁爽彈勁濃味，甘香肥美滑嘟嘟。牛肚依舊軟綿綿，帶少少陰沉醬油味，說不上是滷水汁，感覺不到清香味道。雞中翼豉油味只留在外沒有滲入內部，滑滑彈彈不乾霉，雖然有點偏淡，幸好皮香肉嫩有肉汁。

豆卜炸雲吞雞中翼鴛鴦少湯多辣走蔥加腩汁，豆卜有點油益有點水味，硬硬的烚得不夠耐不夠徹低，榨乾水再用高湯浸才美味。炸雲吞淨係食到塊皮，完全食唔到有肉？好香口炸腐皮味道，浸湯半濕半脆。辣汁深啡色味道非常濃厚，咸辣佳強，大熱天時混入大量辣汁，使得我額頭冒汗，背脊濕濕滴滴咯。多謝戴姐慷慨解囊，請食車仔麵！

雲吞韮菜餃雞中翼鴛鴦少湯多辣走蔥加腩汁，雲吞散筲筲，蝦仔細細咸咸的，肉碎真係十分碎。韮菜餃微溫不熱，外暖內凍，而且烚到散散地變晒形在爆破邊緣，味道免強還可以，不過何解完全無肉既？

豬紅雞中翼鴛鴦少湯多辣走蔥加腩汁，平到笑 $22 蚊勁抵！我話要多辣，點知阿姐竟然孤寒到比一篤仔，平時唔會這樣對我的，梗係厭我食得少又要求多多，算數﹗我自己埋位加兩大羹辣汁，多辣再加加辣。

紅腸雞中翼鴛鴦少湯多辣走蔥加腩汁，紅腸薄切，沒有入何肥美多汁感覺，食火腿一樣，只是多一點肉甜肉香。食雞翼要㖮噒骨真係要花多一點時間，未能數分鐘整碗消滅，最快都要 6 分鐘才能完成添。麵底份量真的比出前一丁多架，食碗丁麵只需 3 分鐘倒落肚！

豬紅牛肚幼麵少湯多辣走蔥加腩汁，河粉通常都最早沽清，無鵚鴦唯有食淨麵。爽爽嚥韌麵味清香，掛著濃郁辣辣大啖啜，香辣醇美依舊。夾著豬紅或是夾著牛肚一齊食，更添姿彩。豬紅極度滾燙，太美味停不了塞入嘴仔，甩皮喇﹗外脆內嫩彈彈滑淜，醃味濃郁好好食啊﹗

韮菜豬紅雞中翼鴛鴦少湯多辣走蔥加腩汁，韮菜真的誇張的多，將整碗麵完全覆蓋，太多韮菜有點反胃，碗底全部都係韮菜。主要因為無味只有原味沒有菜甜味，味道寡而單調。

酸齋豬紅雞中翼鴛鴦少湯多辣走蔥加腩汁，嬸嬸您烚到河粉散晒喇，半溶腍劈劈碎濕濕，老闆無教您煮鴛鴦時粉麵要分開烚的嗎？低於室溫涼涼的，濕濕的甜酸麵筋十分醒胃，辣汁粉麵夾著甜酸齋齊齊趙，怪味有趣。天氣真係十分酷熱，熱湯加辣汁食到汗水滴滴啊﹗

豬皮蘿蔔豬紅鴛鴦多辣走蔥加腩汁，我都話要少湯咯，唔洗錢咩！太多湯水汪汪，就算多辣都溝淡晒啦﹗咖哩豬皮十分之多，味濃爽爽無油益，全部無骨可以任意用麵捲住掃落肚。蘿蔔勁爽甜勁多水，不過去皮不夠乾淨。粉麵均煮烹調出色，軟滑嚥韌適中，帶湯力強啜得暢快。瞓得兩個幾鐘非常渴睡，極速 5 分鐘消滅，立即回公司休眠昏睡叉叉電。

豬紅蘿蔔牛腩鴛鴦少湯多辣走蔥加腩汁，物價騰貴只得兩舊牛腩，終於不是牛腩碎，係完整兩舊鬆化牛腩，腍但有渣。碎濕濕，下欄邊皮位，乾爭爭味道咸濁，不喜歡。牛筋極多，黏膠滑味濃不錯，太飽食剩一塊巨形牛筋添，抱歉。

豬皮豬腸鳳爪雞中翼鴛鴦少湯多辣走蔥加腩汁，單翼單爪，姐姐話雞翼不夠用鳳爪代替，無所謂。乾霉瘦雞翼不肥美，賣剩蔗的質素。炸爪平凡一般，室溫偏凍，醬汁都已凝固了。微暖不熱的湯汁，那會食得開心？嚥韌幼麵，實淨河粉，添點姐姐推介的辣菜甫，只有咸味，試一次便夠。

豬皮牛腩牛肚幼麵少湯多辣走蔥加腩汁，牛腩不碎，造型多變，變成乾鞋牛腩片﹗嚥韌乾爽極有咬口的幼麵，再次遇上微暖溫度的湯汁。何解要微溫的湯煮麵呢？剛剛加水所以未滾得起嗎？靜蠅蠅無煙無鑊氣，食慾大減唔開心，泡個杯麵都熱過您，唔熱邊會好食﹗

通菜豬紅豬腸鴛鴦少湯多辣走蔥加腩汁，師傅烚既次序那麼特別既？先做麵底，再烚河粉，最後菜鋪面，可能粉麵撈埋一齊兜的話，河粉會散晒，亦可能通菜比粉麵還要煮耐一點。旱通味道還可以，有菜甜味，爽爽實淨，不乾硬亦無渣。幼麵極具咬口堅廷我鍾意，捲著彈滑河粉塞入口，兩種味道與質感碰撞得精采萬鈖。