甘棠燒鵝

營業中

休息中

最推介炒粉絲！微微辣。臘腸炒介蘭，亦唔錯！用料高級！鵝紅，滑滑，有味！不過貴啲！2件要＄30！總是感覺係下價嘢！滷水鵝腸＄100，仲貴，不過仲好味！法國鵝肝要＄100兩片，味道普通！可能煎香層皮好味啲！佢嘅做法係滷水切片！點解唔用自己嘅鵝肝？反而佢啲雞肝好好味，＄48！酸薑皮蛋，糖心！黑白义燒！好味！唔知食咁燶對身體有冇問題！可能祈望太高，半隻燒鵝，冇食到最嫩嘅鵝脾，感覺其他部位普普通通！出面高檔酒樓一般都食到！唔夠深井好！可能唔係即秒出爐關係掛！上次去深井食，人家係計算時間，講明幾點幾分出爐！環境：細，茶餐廳格局！坐得舒服！冇白枱布！衛生：不過衛生唔錯！食具清潔！服務：不錯！總體來說不會有問題！可以重複光顧！

燒鵝得死咸同淋皮，一般燒味舖都可能好食過佢，但個價就同質素有好大落差，咁嘅食物點對得住個價錢，其他燒味舖都可能可以食到兩份啦。其他嘢食嘅份量都係少得可憐，唔講以為去咗非洲冇飽飯食咁，唔明一間都算出名嘅餐廳點解可以做到咁。至於服務就更加失望，基本上係零服務可言，由入座到落單到埋單都係冇人想理你，千呼萬喚先得仲要睇人臉色，基本上當係快餐店咁當咩都要自己嚟咁成個觀感就會好好多，唔好對服務有期望就可以。結論就係食咩都好，揀依一間就等如自己攞苦嚟辛，真係完全搞唔掂。

甘棠雖然個位置都算少人知，但係都算係香港比較出名嘅燒味嚟，以前都有試過幾次覺得唔錯，不過時隔咁耐再去試發現已經冇咁好食，都有啲可惜。甘棠燒鵝話用咗唔同啲嘅方法嚟切可以大大啖肉食開心啲，不過今次去食就明顯發現有唔少碎骨，真係或多或少有啲掃興，而且隻鵝燒到有啲乾冇咩肉汁，要好靠個酸梅汁去帶味先食到，明明係招牌菜嚟都搞成咁。而且啲店員都有啲唔同咗，唔知係放假定係已經冇做啦，啲服務態度都冇以前咁好，以前佢哋會好樂意教你應該點樣食先最好食同有咩特別位要注意，但而家就冷漠咗好多，總係覺得冇咗之前嗰個感覺，真係好可惜。

燒味fans嘅我大大話話都食過唔少香港出名嘅燒味，早掛網上見到原來銅鑼灣南華會入面有間好好食嘅燒鵝幾隱世下冇人知，咁一定要去試下啦，中午時間去到人唔算太多，等咗幾分鐘就已經入得去，一睇menu發覺都唔算平，燒鵝例牌165蚊，雖然味道都唔錯，但炭燒味唔夠未算得上好好食，而且份量都唔太足夠，兩個人食絕對唔飽。另一個招牌菜肥燶叉燒都係唔夠炭香，令到個肥肉個part嘅味道有啲太重，都幾可惜下。同埋員工嘅態度都可以好少少，想同佢反映返食物質素嘅時候可能佢以為我想投訴所以有啲黑面，搞到我都廢事講落去，總結嚟講食物可以做好啲，服務態度都可以改善，一般啦。

佢d燒鵝同蜜豆真的冇得輸，已經是第3次來。但每次都系一肚氣，完全沒有服務意識，任由D客企系門口唔理，企系門口收銀嗰位阿姐，問乜都話唔關佢事，最搞笑就系叫左杯凍檸茶，拎嚟時問左佢一句系唔系走甜… 位阿姐居然答唔系佢沖… 咩嚟㗎😤😤😤。飲食業出現咁，就算燒鵝真系好食過米🐷連嗰間都冇用啦…佢碟頭飯嘅性格比高，瀬粉，飯都唔差，希望佢真系可以系服務上改善下。

🔍 香港有三大出名燒鵝：鏞記燒鵝、甘牌燒鵝以及甘棠燒鵝。呢三間燒鵝嘅主廚都是由鏞記燒鵝出嚟。甘牌是鏞記後人細佬開鏞、而甘棠燒鵝就係本身在鏞記工作嘅主廚，所以三間燒鵝都是很出色。至於我，就很喜歡嚟甘棠食，除咗環境寬敞，食物亦多選擇；佢其中一個皇牌—— 甘一刀叉燒簡直百吃不厭！ 而今次唔係見客嘅關係，我只叫咗簡單飯餸醫肚。1️⃣2️⃣3️⃣0️⃣ 午飯時間🥘蕃茄蛋煮牛肉 $128 ⭐️⭐️⭐️⭐️正常家庭小菜，蕃茄夠濃味，牛肉嫩口，送飯一流。🍜燒鵝雙拼香雞瀨粉$75 ⭐️⭐️⭐️⭐️⭐️鵝一向出色，唔會騷，雞件滑，先將薑蔥落入碗瀨粉食，更加香。🍖脆皮腩仔 $80⭐️⭐️⭐️⭐️⭐️好夠鬆脆，肉質唔會變左瘦肉果種硬，點芥末醬非常惹味。

甘字輩嘅燒鵝越開越多，但係質素各有好壞，甘棠真係唔值得咁出名，招牌燒鵝係唔差，但係其他燒味部就真係有啲令我失望，個肥燶叉燒太過油，蓋過曬啲叉燒本身應該有嘅味，食完仲一口油，影響曬食慾。而且價錢相當唔平，食一次試下伏算。

質素講真就真係一般，絕對冇其他人講嘅咁好。燒鵝燒得偏乾肉汁唔夠，價錢都唔算係平，不過份量都算係大份，都算可以接受嘅，但係其他小菜就出奇地細份，令人懷疑係味想刻意等客人叫多啲。而個油雞就真係唔太得，肉質好鞋調味都太重手，搞到雞本身嘅味出唔到，浪費曬。另外店員態度都唔算太過好，要叫幾次先肯過嚟，亦表現出唔係太想serve我哋咁，明白佢可能有啲原因先會黑面，但我作為一個客人睇依隻事真係有少少失望。餐廳環境就正正路路，唔算特別乾淨但有少少油煙，整體都可以接受，但真係有咩好特出嘅位。

兩星期內去過兩次，午餐及晚餐，午餐當日我們一行五人叫了半隻燒鵝及其他燒味，上菜時已覺得奇怪，因為看不見燒鵝髀在上面，取而代之是一些一片片的鵝胸肉，以為米之蓮餐廳與別不同？吃下去，找來找去總找不到燒鵝髀肉(疑似上髀及下髀也找不到),問侍應時,他知唔以對，解釋上裝跟下裝有什麼分別，後來知道我們叫的是半隻燒鵝後便補返一隻鵝髀給我們，冇影相因為本身冇諗住寫食評，亦以為係個別事件忙中有錯。 但昨天晚上一行三人再去食飯，真係離譜得好緊要，因為那碟鵝一食便知鵝肉是壞的，通知侍應後，侍應自己也不敢試，我相信佢自己心知是什麼一回事，但最後不但冇換過另一碟鵝給我們而且錢照收。朋友吃完還拉肚子！ 之前見到有人寫食評話外賣燒鵝唔見咗隻燒鵝髀，我也覺得是個別事件，但而家可以話俾大家聽騙案喺呢間餐廳經常發生，因為我去兩次就被騙足兩次。

之前成日聽人講銅鑼灣有間燒鵝幾出色，咁啱經過嗰邊咪諗住去試下囉，結果真係好失望下。店員一直推介我哋試下個甘一刀叉燒，話係必食咁，結果上到嚟黑到成舊炭咁，店員話係正常但明明一上到檯已經暈到陣燶味，明顯係冇睇好火啦，叫佢哋可唔可以換畀我咃仲要畀佢哋鬧，真係食到一肚氣。到最出名嘅燒鵝又係得啖笑，雖然味道係可以，但係骨多過肉，又全部都係肥肉嚟，真係唔知食咗啲咩。真心唔會有下次。

總體嚟講感覺啲嘢食都係一般水準，啲燒鵝上枱時已經無晒溫度，口感大打折扣，可能係個人原因，一咬落去靜係得肥膩嘅感覺，燒鵝皮一啲都唔脆，其他菜式就不過不失，叉燒感覺仲好食啲

之前見飲食達人推介特登叫埋朋友嚟食，滿懷期待嚟到結果發現個名真係吹出嚟架，唔可以話好差，但質素普通過普通，同期望值有落差。今次就當係用錢買個教訓啦，乜嘢推介都好始終都係要自己把口試過先知係咪好食

上網睇見啲人對依間嘢嘅評價有讚有彈，主要都係話唔抵食咁，今次去開銅鑼灣就諗住去試下啦。坐低之後叫咗個招牌燒鵝脾瀨粉先，168蚊的確唔算平，不過鵝脾大大隻，成隻碟咁大，上到檯仲出緊煙，配埋個自家製酸梅醬好開胃。不過個瀨粉就冇咩驚喜不過不失咁，可能佢哋都係主力做燒味啦。自己本身都係細食之人，覺得依個份量啱啱好食得飽，唔會好似其他人講到完全冇嘢落肚咁。價錢偏貴係事實但的確係食得出質素有分別，都係值得一試。

甘棠燒鵝📍 銅鑼灣加路連山道88號南華體育會1樓 燒鵝髀瀨粉$168*總結：無論湯底，瀨粉同燒鵝都極度出色。非常值得一試😋👍🏻甘棠燒鵝-係由前鏞記燒味部主管馮浩棠先生主理。難得去開南華會，一定要去試吓。由於都幾full吓，叫咗大概等左20分鐘左右先有得食。先試吓啖湯，非常鮮甜名副其實嘅上湯，瀨粉爽滑彈牙軟硬適中。至於燒鵝髀更加係冇得輸，皮極之香脆，咬落勁有鵝油香，肉就嫩滑多汁。整體來講係一碗非常高質既燒鵝脾瀨😋

-{銅鑼灣南華會燒味店🍗}呢間好出名個燒鵝髀😆幾得閒就去左食lunch🥳🤤燒鵝脾瀨粉🤤 ($168)一碗嘅份量都幾多 鵝脾好大隻 勁多肉汁 個皮好脆😍😍😍個酸梅醬係自家製 梅味好出🤓最底嘅生菜吸曬啲汁好正😙另外碗瀨粉係配清湯 麵質好彈😛😇👖褲評: 8.5/10好高質😍環境同服務都唔錯😉不過價錢偏貴🤨可以黎試一兩次 但唔會成日去😌性價比: 7/10服務: 8/10環境: 8.5/10🚩甘棠燒鵝🚩地址: 銅鑼灣加路連山道88號南華體育會1樓#fuudjai #fuudjai港式 #fuudjai銅鑼灣