王牌冰廳 (燒味世家)

營業中

休息中

買個早餐外賣， 見到個阿姐沈迷傾計慢慢執都算，重要見到佢執餐具時，將跌左落地下既匙羹插返落乾淨個d度， 真係忍唔住，同佢講重要扮唔知，食物又一般，其他食肆執哂先會再考慮幫親

今日又黎王牌冰廳~估唔到晏晝都咁多人，好彩今日一個人食所以好快就有位，之前食過早餐覺得叉燒真係唔錯於是就叫左叉燒炒蛋飯~LUNCH SET仲包野飲同埋中湯!鍾意呢度所有野夠快，但員工又有禮貌，好快我碟飯就到左，叉燒完美地同炒蛋融合埋一齊，不過今次既叉燒略嫌肥左少少，唔知係咪因為配炒蛋所以要用d肥d既叉燒?而炒蛋份量好多，炒得好滑而且有蛋味，加左d蔥所以香味更濃!飯面淋左d豉油，成碟飯撈埋食好快就清碟!呢間餐廳真係平靚正~

新開張好多人嚟食，好似都有電話落單嚟到先拎嘅服務，咁以後要斬料返屋企就方便咗啦餐牌得一個，前後兩頁雙拼燒腩仔叉燒燒腩仔好脆，腩位肥瘦均勻不過叉燒全舊都係瘦叉，需然整整齊齊好靚，但係都需要多點嘅肥膏油脂點綴返個飯又嚟多個打孖，燒鵝拼叉燒叉燒又係全舊都瘦，燒鵝位唔係胸肉，又唔係髀肉(鵝胸鵝髀都要加錢)，香味不過不失總括黎講呢度係乾淨企理嘅燒味店，服務周到，呢個價錢都尚算合理，而且仲有淡湯飲吓(雖然送完即止)

服務真係好好，一入去即安排座位，熱騰騰冇味精靓湯秒速送上。燒味超好味，巳幫親第4次，早餐、下午茶同晚餐都試過。我本人試過叉燒、燒餓飯，巳包條菜（熟同暖嘅，我最憎d菜餐廳送條又硬又凍嘅菜芯）加分！份量剛好，米飯軟綿👍🏻👍🏻價錢係區內算平，係開心價， 晚餐$49（叉燒飯+ 奶茶）👏🏻👏🏻👏🏻謝謝用心經營，我會繼續光顧

朋友推介，指其燒味份量多，所以一試，下午茶時間叫左個燒鵝瀨，36蚊，見到係個脾位都幾開心，但點解冇左層皮既，初時以為係底，點知真係冇，嗰下都幾失落，有冇皮差好遠，食落味道普普通通啦。

昨晚唔想煮飯 同屋企人諗住落街睇吓食乜 聽街坊話有間燒味開左唔錯 所以去試吓 去到門口好多人 要排隊攞飛仔 睇住入面地方係雖小 但見到燒味好多新鮮出爐 等左一陣 有員工話差不多到我地 幫定我地落單 我見到餐牌有五寶飯 見價錢又唔算貴 好似每樣餸都有d 所以試吓 亞媽就叫左口水雞 到入去坐 一坐低有兩碗湯 我仲話 我冇嗌噃 原來話會送湯飲 又唔錯喎 食物到左 燒腩仔好脆 义燒半肥瘦 仲見到不停燒味出爐 我整體覺平民化價錢 太興仲貴啦又唔係新鮮出爐 都可以再試其它

茶記食物水平，比茶記差少少既服務，同仲迫過茶記既環境叉燒嘅質素其實好普通，同一般嘅燒臘舖冇乜分別，叫半肥瘦但係其實仲係有啲乾，早餐四個人叫四個餐根本放唔到。當佢係一般茶餐廳嚟食就差唔多，唔好太大期望。其實如果一早定位自己去茶餐廳唔好俾人有咁大期望，成件事嘅感覺應該會好啲，但係講到自己太勁但係之後個落差唔係咁容易比客人接受。不過食物都唔係最大問題，環境超級迫好大問題，張枱細到放嘢食都放唔到，超易倒瀉野。

第三次幫親，但今日吃完野，低頭禁電話唔夠1分鐘，抬頭一望，張枱清曬，野飲仲有半杯，個刻感覺十分不好，職員起碼收枱都問人仲要唔要啊，同姐姐講話做咩收走得杯野飲，執枱姐姐即刻用不友善既眼望住我，雖然有補第二杯俾我，但我真心唔敢飲，走個時都同店家反映

同朋友食晚飯，諗唔到食咩好，知道呢間新開左無耐，所以就過黎試下啦呢間鋪主打燒味，一定要試下佢既燒味飯啦！因為果陣都夜，好多都賣哂啦我叫左切雞叉燒飯，叉燒厚切，都夠淋，味道都算唔錯不過雞就麻麻地，皮太厚，無乜肉。。。另外叫左一碟豬手冷盆，又幾好食喎！值得一試！

搬來了將軍澳多年，一直最不滿缺乏港式茶餐廳（屋企附近），連鎖集團旗下餐廳就有大把；最近終於開了一間「王牌冰廳」，即刻走去試試。原址以前是「Pizza Hut」，雖然只是專做外賣，但將軍澳區實在太多 Pizza 店，競爭劇烈，「Pizza Hut」既不特別好食、價錢亦不夠便宜，撤離也是意料中事。餐廳新開張不久，很多人抱着相同心態試食新餐廳，等了10多分鐘才有位。餐廳名字雖然係「冰廳」，但重點推介卻是蜂蜜叉燒，餐廳門口亦有一個小小的廣東燒味砧板枱，掛了一隻燒鵝、油雞、切雞及原件燒腩，限制於餐廳面積太細，見不到原隻大燒豬。上手租客「Pizza Hut」沒有堂食，已經估計舖位面積一定細小。一如所料，座位空間狹窄、亦相對擠迫，不過，裝修尚算乾淨企理。睇完餐牌內容就有點失望，雖然自詡「冰廳」，港式茶餐廳食品實際上只有早餐及幾款三文治，即炒粉麵飯欠奉；只是主打各式廣東燒味，餐廳名字換成「燒味茶餐廳」更為合適。難怪餐廳老闆自創燒味俠形象，在兩邊牆上畫上了燒味俠漫畫。雖然談不上什麼室內設計品味，但非常生動有趣。是日例湯青紅蘿蔔煲豬骨，淡而無味；明顯湯料份量太少，但湯水太多。原隻燒鵝髀飯（$88）拼燒腩仔

今日同老婆十一點半去，叫左一個叉燒瀨粉，一個雞肉飯，再加油菜 同埋拍青瓜。叉燒無得輸，一碟包左有全瘦同半肥瘦，外層香脆，里面肉嫩，豉油咸甜適中，送飯更加一流燒肉皮尚算脆，雞以及油菜就中規中矩，青瓜都是好脆，唔會太辣，豉油也有甜味，有別於一般的，視乎個人喜好。下次來要試下撈公。

原本打算去陳記食燒鵝，不過老公話想試下新野！沙薑豬手，唔油膩，本來唔太鍾意食豬手既我都食左兩舊，燒鵝脾賣相一流，味道超正，燒鵝皮夠脆，半肥瘦叉燒厚切夠淋，例牌都咁大碟，簡直性格比高，值得再去！

今早和老公食早餐，看到這家冰室試業，便試試他的味道。因為是新店開張，環境光亮企理，顏色以白色為主👍🏼有卡位亦有圓枱。早餐選擇不多，有六款可供選擇，我食雪菜肉絲米，老公食王牌叉燒忌廉湯意粉，本身意粉想轉通粉，但試業期間，店員話唔可以轉住，因為怕打亂廚房節奏😌食物質素方面，牛乳炒蛋有點過濕🙈牛油厚多士並不厚，比平時其他餐廳食的薄，但味道不錯，不會乾乾的👍🏼雪菜肉絲米正常，選用了軟身米粉熱奶茶的味道也可以

卻說將軍澳有「美食沙漠」之稱，無他，大型商場林立，連鎖餐廳壟斷整個地區。要找地道餐廳，只能在坑口站周邊屋苑或寶琳才能找到。家住將軍澳的我一直深感無奈，有一天經過將軍澳中心某一地舖架起圍板，正進行裝修工程。今天再次經過，餐廳在試業中，29/3才正式營業，決定一嘗。餐廳面積不算大，只有4、500平方呎。餐牌亦相對簡單，主打燒味。點了個燒鵝腩仔雙拼飯加奶茶。賣相尚算吸引，份量方面，肉的比例還算可以，飯的份量則相對較少。先看腩肉close-up，層次尚算分明，外表亦算脆口，只可惜瘦肉部分其實也夾雜有至少一半肥肉，令整塊肉顯得略為肥膩。至於燒鵝，可能我運氣不夠，也不想加$8元指定鵝胸，只能得到腹膜部分。味道不錯，只是該部分瘦肉不夠，有點「吃了等於沒吃」的感覺。奶茶則是不過不失的茶餐廳水平。總體來說，$54一個雙拼飯不算便宜，性價比不算太高，但勝在新鮮感取勝。等到正式營運，早餐上線後，才可以決定能否跟他維持長遠關係。

新開張去試下, 叫咗個肥叉油雞飯, 點知嚟到變咗瘦叉油雞飯, 可能係師傅做嘢係自動波叫乜都係畀嗰樣嘢 ，食落叉燒又乾又鞋又硬, 有少少隔夜的感覺，之後咪試下油雞 都算一般…總算普普通通，有得選擇不會選擇這間了… 希望將軍澳會開一間正常過佢嘅燒味餐廳。