影片
更多
2012-09-04
4290 瀏覽
嘻嘻，又有uncle請小肥試新地方，真係口福不淺。今次決戰新潮潮州菜館，雙潮之「潮廳」！唔知uncle係咪VIP呢，定係潮廳服務本身就係咁好？我地當晚個飯局長時間都有兩三位姐姐仔或哥哥仔斟酒，加水，分餸，換碟。經理哥哥Remy亦不時巡視打點，所以XO仔不忘把握機會向佢了解一下潮廳o既運作。據Remy哥哥所講，潮廳個老板好注重私人空間，所以設計潮廳o既間隔時，講明唔要有大廳，全部要做房，而且不設最低消費。唔計間K房，潮廳只係有四間房招呼客人，每間大小不同，最細嗰間都可以招待四個人。我地當晚嗰間係最豪華最大間o既，既有私人洗手間，亦有酒吧，更可同K房打通。間房好夠光猛，企理，舒適，不過坐耐左就覺得個冷氣唔係好夠，就算開到盡，連平時怕涷o既姨媽同姨丈都要寬衣，小肥同大肥就當然係不停滴汗啦。席上共十六人，坐得都好鬆動，似乎坐多四五個都冇問題。房中最特別o既就係個自動轉盤，如果開左，就會一個速度慢慢轉，冇得加速或減速，只可以停，所以轉緊時夾餸，真係手快有，手慢就要等佢轉。好彩大部份食物都係姐姐仔幫我地分埋，所以個轉盤郁唔郁都冇乜所謂。 潮式大紅蟹：XO仔由細到大都對蟹敏感，所以冇份食。不過，依味
唔知uncle係咪VIP呢，定係潮廳服務本身就係咁好？我地當晚個飯局長時間都有兩三位姐姐仔或哥哥仔斟酒，加水，分餸，換碟。經理哥哥Remy亦不時巡視打點，所以XO仔不忘把握機會向佢了解一下潮廳o既運作。據Remy哥哥所講，潮廳個老板好注重私人空間，所以設計潮廳o既間隔時，講明唔要有大廳，全部要做房，而且不設最低消費。唔計間K房，潮廳只係有四間房招呼客人，每間大小不同，最細嗰間都可以招待四個人。我地當晚嗰間係最豪華最大間o既，既有私人洗手間，亦有酒吧，更可同K房打通。
間房好夠光猛，企理，舒適，不過坐耐左就覺得個冷氣唔係好夠，就算開到盡，連平時怕涷o既姨媽同姨丈都要寬衣，小肥同大肥就當然係不停滴汗啦。
席上共十六人，坐得都好鬆動，似乎坐多四五個都冇問題。房中最特別o既就係個自動轉盤，如果開左，就會一個速度慢慢轉，冇得加速或減速，只可以停，所以轉緊時夾餸，真係手快有，手慢就要等佢轉。好彩大部份食物都係姐姐仔幫我地分埋，所以個轉盤郁唔郁都冇乜所謂。潮式大紅蟹：XO仔由細到大都對蟹敏感，所以冇份食。不過，依味餸就成功地取悅大肥爸爸啦，仲話同中華總商會嗰個有得fight，叫我一定要喺openrice度表揚！佢解釋，個蟹唔難煮，最重要係貨源好，因為Ｄ蟹靚，蟹肉就自然會如此鮮甜肥美。爸爸特別欣賞個蟹容易食，佢完全唔需要用到蟹鉗。烹飪有兩手o既媽媽話：只要將煮熟左o既蟹放入冰水浸一陣，啲蟹肉就唔會黐住個殼，食起上黎就唔洗咁多功夫啦。
滷水鵝肝拼盆：去到潮州菜館當然係要食返啲傳統潮州菜，試下佢啲Chinese Kungfu啦！XO仔對依個拼盆基本上好滿意，尤其係個滷水鵝肝，真係覺得中國廚藝絕不比法式料理遜色！潮廳o既滷水鵝肝肥厚得黎唔硬兼唔粉，口感非常實在，而且食完唔覺好溜，不過就好難同法式香煎鵝肝o既脆皮軟心比較，因煮法不同，只可以話係各有千秋。長輩們怕膽固醇，所以都要就住黎食，不過佢地大多喜愛揀食滷水豬腳仔同豬耳，因兩者都好香脆入味。XO唯一對個拼盆o既鵝腸有微言，因為鵝腸比人去哂肥，食落去幾爽口都已經唔係嗰回事。
潮州紅燒大魚翅：魚翅每碗份量都好足，真係好有睇頭，絕對唔失禮！個湯底亦好夠味，似乎用足料黎餚，只係個人覺得偏咸，不過，好彩加左兩滴醋中和返，味道變得更香濃。
黃金蝦蟹棗：首先要讚個餸夠熱，因為就算姐姐仔幫我地分埋先上，入口時嗰兩粒蝦蟹棗仲好熱辣辣！蝦蟹棗都炸得又香又爽口，食得出佢加左幼細o既馬蹄粒黎做出依個效果；伴碟o既炸米餅網都幾得意，只係可能用油多左，所以唔夠脆。另外，每人隻碟上都已分有甜醬，衛生得黎客人又唔洗排隊等轉盤點汁，真係好周到。
鹽燒海「魚立」魚：揀飲擇食o既XO仔唔係好食中式烹調o既魚，因為怕骨，好多時都唔食魚，或者只係食魚皮。咬左一口，覺得依味鹽燒「魚立」魚個魚皮非常香脆入味，明知大肥勁鍾意食，小肥就好孝順地比哂爸爸！
芝麻炆魚鰾：細老見識少，從未聽過「魚鰾」係乜。XO一向求知慾強，又唔怕羞，所以就問左姐姐仔兩句，佢就話我知「魚鰾」等同魚肚，即做花膠之材料。第一次食魚鰾，口感好似點心「棉花雞」入面o既「棉花」咁，爽口得黎又好軟棉棉。潮廳用芝麻黎炆唔知係咪想玩fusion呢？個人覺得個味道似花生醬多過芝麻醬，有少少怪怪地咁，所以建議師傅用返個傳統茨汁效果可能會更受歡迎。
鹹香走地雞：可能小肥食得太多鵝肝啦，食到依味已經食唔落要中場休息。雖然冇食到，不過見到雞骨間帶鮮紅色就知隻雞係新鮮，而非冰鮮o既。
糖醋乾燒伊麵：每人一份小圓餅形o既兩面黃，簡單精巧，燒得亦好香熱脆口。每人一碟私人糖醋，食得乾淨衛生，份量又剛剛好，好恰當o既單尾。
翻沙金銀條：因為XO仔約左女仔食完晚飯去跳舞，所以唔可以食得太飽，只好選擇唔食依味較油o既甜品。睇相（分開上載）都睇得出個翻沙金銀條做得好夠乾身，而且姨媽亦覺得個味道唔會太甜，應該幾唔錯。法式甜品薈萃：依味甜品係師傅為晚宴特製o既。睇相未別睇得到，不過個甜品係杯中有杯，甜品中有更多甜品。問一問姐姐仔先知原來底杯中黃色幼粒只係裝飾，唔食得o既。而面杯入面除左有相中可見o既士多啤梨，黑梅，藍梅同栗子之外，其實仲有雲呢嗱雪糕，朱古力慕絲同一粒糖喺中間，無論味道或口感都好有層次，可以自選成越食越甜，即由外食至內，又或者係甜淡中和，好啱小肥口味！
Remy哥哥解釋，人少時，餸菜可以例牌咁叫，不過人多時，佢就會提議幫客人度身訂做一個套餐，價錢就用人頭計。當晚個菜單有翅，大概每位一千蚊左右，酒水加一另計。私人房黎計，有翅，有蟹，又有水準，一千蚊位其實都可以算係合理。小肥有人請，個心當然仲覺得抵啲啦！後記：
1)據說，潮廳並非酒店內之餐廳。小弟上過Cosmo酒店網頁查證過，真係冇被列入在酒店餐廳內。
2)潮廳個開瓶費好特別，因為佢唔係續枝計，而係每個人頭計，每位一百。
3)K房包房費為HK$5,000，當晚小肥都試過，唱左一首歌。可能人少，嗰度個冷氣又OK wor，而且可以用pad pad點歌，尚算先進，只不過音響就有待改善啦！
張貼
