海南粉 (已結業)

佢lunch有好多唔同種類的set,差唔多次次都係order 佢個牛肉撈檬!個粉好滑,好淋.如果你唔鐘意呢種口感,都會覺得一pat pat. 但係lunch多數都唔洗等位,但係上菜ok慢!

去完旅行社要返學, 路經此地又見唔太多人, 於是入左去, 以為有特別既粉麵(海南粉), 原來都係米線...我叫左個套餐, 本來想叫佢地既招牌米線- 牛肉乾米線, 但一見有蕃茄類湯米線就即轉, 要左個蕃茄手撕雞湯米線, 只有數件蕃茄, 湯底唔係蕃茄, 米線都ok, 手撕雞好多, 不過好"鞋", 飲品係熱茉香珍珠奶茶, 仲未飲過熱飲係咁凍既...好失望! 侍應亞姐好cool...個個都無咩笑容!

係無咩味的一碗米線，招牌牛肉乾粉都一般啦！我叫的時菜餃粉，餃皮好厚好乾。

7.20(四)本來諗住入黎食粉,點知入到黎又突然想食飯,最後叫左咖哩牛腩配香飯咖哩好香椰香味,唔算好濃咖哩味,牛腩炆得幾淋幾入味,香飯比普通白飯油同埋有d椰香味加埋凍檸茶,又一餐\,下次先試d粉

星期日晚同女朋友到旺角食晚飯，路經門口，見佢話到個招牌湯粉好好食，好正宗，就入去試下! $16 的招牌貨，主菜係牛肉乾，配花生，酸菜米線，份量夠女朋友食，好普通，都算好味! 我叫了個手撕雞濃湯米線，手撕雞有雞味，份量合適。最難忘係個甜品- 炸麻蓉湯丸，有朱古力醬係上面，好好食，有驚喜，只不過$8四粒。但個燒骨小食就好硬，咬唔入。

之前試過土瓜灣店及金馬倫道店﹐對海南粉印象唔錯﹐食物有特色及味道不錯。前晚經過旺角店﹐再幫襯多次﹐有以下簡評。食物方面好像比金馬倫店遜色﹐我要的是濃湯牛肉乾粉﹐但上來的湯是界乎我在金馬倫道店吃到的濃湯及清湯之間﹐雖然味道尚算不俗﹐但本身有特色有個性的濃湯始終才是配合招牌牛肉乾的最佳湯底。另外要了一個酸辣手撕雞﹐只賣$18 我覺得幾抵﹐份量都夠兩個人食。酸辣的味道頗特別但我覺得並不特別討好﹐如果可選擇我寧願配芝麻醬或麻辣醬更會合我口味。清湯包心貢丸﹐水準一般﹐似是急凍“量產”貨色。賣$20/5 粒並不算便宜﹐而且當中有兩粒中間的餡汁已流失。下次可以試其它的。服務算是有禮﹐但有點懶及大意﹐上桌時往往送錯了食物去其它檯﹐其實只要花數秒望一望客人的單上要了甚麼﹐就不容易搞錯。但我觀察了大半小時﹐似乎欠缺這方面的訓練。店鋪環境算整潔﹐在旺角區的廉價食肆中﹐是難得的。

招牌牛肉乾湯粉...幾好味小食有番咁上下...幾好味價錢合理

有次同fd黎"打牙較". 有叫main. 就咁叫了小食連飲品. 樣樣野唔過$15 蚊.size 有番咁上下. 椒鹽豆腐做得不錯.即叫即整嘛. 不過係坐得冇咁舒服囉.

因為朋友是海南雞飯怪, 尋晚去完先達, 經過見到"海南"兩個字, 已經決定去呢度. 坐底才知"海南粉"同海南雞無關, 餐牌都唔覺有海南雞食. 其實餐牌有解釋何謂海南粉, 不過我呢個怕睇字的懶人, 冇睇到=P我叫左香辣牛丸粉, 朋友側叫了手斯雞粉. 湯底幾濃, 甜甜地, 有花生(仲脆), 香菜同埋白芝麻. 粉就好似米線. 手斯雞OK, 因為只吃了一條, 比唔到評語. 牛丸就明顯見到混了辣椒碎. 已經幾辣的牛丸加上熱湯=真係幾辣! 不過就覺得牛丸"鞋"口, 爭D咁.

依我記憶,我第一次食既時候係去尖咀0個間,不過比我最深印像就係黎旺角呢間~進鋪既時間大概係十點左右,可能因為接近收鋪,所以鋪內都幾靜下...同女友同樣點左招牌既牛肉乾麵(類似呢個名)..個麵既湯真係幾濃幾好味,而且湯內有花生等配料~幾好味..(不過查實我係唔喜愛食花生架,所以揀哂出黎..)食舊牛肉,真係幾乾喎~不過又好有肉汁~都幾好~不過最深刻係間鋪既冷氣,可能為左慳電啦,加上碗野又極熱..嘩~食到成身都濕呀~~就係因為呢次既經驗,我都無去第二次喇..

佢個咩招牌海南牛肉乾麵..唔係佢最MENU最頂~搞到我叫左咖喱豬肉飯先發現,睇佢D簡介好似好好食咁喔.....唯有有機會再試過啦~!個咖喱豬肉都幾好食~~不過我朋友話拎黎煲湯就o岩..咁樣唔好食喎!我就覺得ok啦~~今日d紅蘿蔔好甜~~仲好多下,不過薯仔少左d~食到咁上下已經冇乜一開始食o個下香味~不過飲番幾啖茉莉綠茶就醒神番哂啦!隻綠茶都幾好飲~仲好大杯~呢個餐$35送綠茶/紅茶,凍飲加$2.但我地冇話要凍飲佢都比左我地,收多兩蚊..不過算啦~~~